Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 379 Hüküm no: 627 Orijinal metin no: [61b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ortadan kaybolan Taşcı Ömer’in işletmesindeki merkepler ile alet ve edevâtın kayyım tayin edilen karısı Hatice Hatun’a teslim olunması Maʻrûz; Derûn-ı arzuhâlde mezkûr gaybet-i münkatıʻa ile gāʼib olup hayâtı memâtı maʻlûm olmayan Taşcı Ömer’in zevcesi ve evlâd-ı sıgārının anaları olmağla mâl-ı mefkūdu zabt ve hıfza yedinde olan hüccet-i şerʻiyye mûcebince kayyım [ve] vasî nasb olunan sâhibe-i arzuhâl Hatice nâm hatun Dîvân-ı âlî çavuşlarından Ömer Çavuş mübâşeretiyle gāib-i mezbûr taşçı kârhânesinde hizmetkârı olup meclis-i şerʻa ihzâr etdirdiği es-Seyyid Ahmed nâm kimesne muvâcehesinde taşlık kârhânesinde mevcûd olan on iki aded merkepleri ile bir demir küskü ve iki kazma ve bir demir tokmak ve âlât-ı sâire-i maʻlûme gāib-i mezbûrun mülkü ve mefkūd olmağla hâli mütebeyyin oluncaya değin zabt ve hıfza bâ-hüccet-i şerʻiyye ben meʼmûr olmağla binâʼen-aleyh zabt etmek murâd ederim dedikde mezbûr es-Seyyid Ahmed dahi hâl mezbûre Hatice’nin ber-vech-i muharrer takrîri üzere olduğunu ikrâr ve iʻtirâf etdikden mâʻadâ zikr olunan merkepleri ve âlât-ı lâzime-i maʻlûme-i mezkûreyi teslîme müteʻahhid olduğu mübâşir-i merkūm iltimâsıyla tescîl olunup huzûr-ı âlîlerine iʻlâm olundu. Fermân hazret-i veliyyü’l-emrindir. Fî 17 min-Şaʻbân sene 1161