Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 379 Hüküm no: 626 Orijinal metin no: [61b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Panço ile Ali Ağa arasındaki meyve alım-satımından dolayı vuku bulan anlaşmazlığın giderildiği Maʻrûz; Arzuhâl eden Panço nâm zimmî derûn-ı arzuhâlde mezkûrü’l-ism olan Ali Ağa nâm kimesne ile terâfuʻlarında medîne-i Eyüb’de Servi Mahallesiʼnde vâkiʻ derûn-ı bostânda mevcûd kemâl bulmuş meyveleri mezbûr Ali Ağa’nın tarafından vekîli müsteciri firâr eden Yorgo zimmîden kırk guruş semen-i medfûʻ ve makbûza iştirâ ve kabz ve müşterâm olan meyvelerden âhara beyʻ ile itlâf eylediğim mikdâr meyve bahâsı iki bin akçeyi mezbûr Ali Ağa müstecir-i merkūmun firârına binâʼen benden fuzûlî ahz, mâʻadâ bâkī meyveleri zabtıma mâniʻ [olup] baʻde’s-suâl meblâğ-ı mezbûru alıverilip bâkī meyvelere taʻarruz eylememek üzere daʻvâ etdikde mezbûr Ali Ağa dahi müddeʻî-i mesfûrun ber-vech-i muharrer müddeʻâsını ikrâr ve iʻtirâfından sonra red ve teslîmi lâzım gelen meblâğ-ı mezbûr iki bin akçeyi iʻtirâfına binâʼen müddeʻî-i mesfûr Panço zimmîye edâ edip mâʻadâ müşterâsı olan bâkī meyvelere taʻarruz etmemek üzere taʻahhüd ve bu vechile katʻ-ı nizâʻ etdikleri tescîl ve huzûr-ı âlîlerine iʻlâm olundu. Fermân hazret-i veliyyü’l-emrindir. Fî 13 min-Şaʻbân sene 1161