Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 380 Hüküm no: 629 Orijinal metin no: [62a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Marko adlı zimmînin Çiftlik Mültezimi Ahmed Efendi’ye olan borcunu ödemesi Maʻrûz; Havâss-ı [refîʻa] muzâfâtından Çatalca’da çiftlik mültezimi olan işbu sâhibü’l-iʻlâm Ahmed Efendi nâm kimesne çoban tâifesinden olup Vâlidesarayı Ser-bölüğü Ahmed Bey mübâşeretiyle Eyüb mahkemesine ihzâr olunan Marko nâm zimmî ile terâfuʻlarında bundan akdem yedimden müşterâ ve makbûz maʻlûmü’l-hudûd [aded] ganem bahâsından baʻde’l-hesâb hakkımdan bâkī yedi yüz on beş guruş işbu mesfûr Marko zimmî zimmetinde hakkım olmağla taleb ederim deyü baʻde’d-daʻvâ ve’l-istintak mesfûr Marko zimmî dahi cihet-i mezkûreden meblâğ-ı bâkī-i mezbûr yedi yüz on beş guruş hâlâ zimmetimde müddeʻî-i mezbûr Ahmed Efendi’ye edâsı lâzım deynimdir deyü ikrâr ve iʻtirâf etmeğin mûcebiyle meblâğ-ı bâkī-i mezbûr yedi yüz on beş guruşu müddeʻî-i mezbûr Ahmed Efendi’ye tamamen edâ ve teslîm etmek üzere iʻtirâfına binâʼen mesfûr Marko zimmîye tenbîh-i şerʻî olunduğu tescîl olunup bi’l-iltimâs huzûr-ı âlîlerine iʻlâm olundu. Fermân hazret-i veliyyü’l-emrindir. Fî 17 min-Şaʻbân sene 1161