Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 381 Hüküm no: 630 Orijinal metin no: [62a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Es-Seyyid Mehmed’in bıçakla yaralandığı yolundaki iddiâsını ispatlayamadığı Maʻrûz; Medîne-i Hazret-i Ebâ Eyüb el-Ensârî’de sâkin es-Seyyid Mehmed b. Mustafa nâm kimesne meclis-i şerʻ-i hatîrde medîne-i mezbûre sâkinlerinden işbu bâʻisü’l-iʻlâm Mehmed Emin b. Ahmed nâm kimesne mahzarında mezbûr Mehmed Emin târîh-i iʻlâm gecesi esnâ-i tarîkde sağ kolum bâzûsundan bıçak ile amden ve bi-gayr-ı hakkın darb ve cerh etmekle mûcib-i şerʻîsini taleb eylerim deyü eylediği daʻvâ-yı mezbûresini mezbûr Mehmed Emin bi’l-külliye inkâr etdikde müddeʻî-i mezbûr es-Seyyid Mehmed müddeʻâsını beyân içün ikāmet eylediği İbrahim b. Hasan ve Hüseyin b. Abdullah nâm kimesneler tezkiye olundukda makbûlü’ş-şehâde olmadıklarını ahâlî-i mahalleden bî-garaz Müslimîn haber vermeleriyle ve şâhid-i âhar ikāmetine dahi kādir olmayıp tâlib-i tahlîf dahi olmamağla müddeʻî-i mezbûr es-Seyyid Mehmed bilâ-beyyine ve bilâ-yemîn bî-vech muʻârazadan menʻ olunup tescîl olunduğu bi’l-iltimâs huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fî 7 min-Şaʻbân sene 1161