Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 382 Hüküm no: 635 Orijinal metin no: [62a-8] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Selim Efendi’nin Bağcı Hürmüz’den alacaklı olduğu yolundaki iddiâsını ispatlayamadığı Maʻrûz; Müteveffâ el-Hâc Halil’in eytâmı vasîsi ashâb-ı arzuhâl Selim Efendi nâm kimesne Havâss-ı refîʻa <> muzâfâtından kasaba-i Hasköy mütemekkinlerinden derûn-ı arzuhâlde mastûr Bağcı Hürmüz nâm zimmî muvâcehesinde bin yüz altmış senesi Şaʻbânı’nda Pervadi nâm hâlike elli guruş karz verip karındaşı mesfûr Hürmüz zimmî sene-i mezbûr Ramazanı’nda edâsına kefîl olmuşdur deyü daʻvâ etdikde mesfûr müddeʻâ-i mezkûreyi bi’l-külliye inkâr etdikden mâʻadâ müddeʻî mezbûr Selim Efendi iddiʻâ eylediği sene-i mezbûre Ramazanı’nda Hasköy nâibi olan Hayati İbrahim Efendi huzûrunda karz verdim dediği şehr-i mezbûrdan on sekiz ay mukaddem bin yüz elli sekiz senesi Rebî‘u’l-ûlâsı’nda hâlik olan mesfûr Pervadi zimmetinde mâl-ı yetimden elli guruş olup kable’l-edâ hâlik olmağla karındaşı Hürmüz edâsına kefîl olmuşdur deyü benden daʻvâ ve bir vechile isbât edemeyip baʻde’l-istimhâl ve’l-imhâl izhâr-ı aczi zâhir ve tâlib-i tahlîf dahi olmamağla bilâ-beyyine muʻârazadan müddeʻî-i mezbûr menʻ-birle nâib-i mûmâ-ileyh tahrîr ve ale’t-tafsîl iʻlâm vermiş idi deyü takrîri üzere bir kıtʻa iʻlâm ibrâz ve müddeʻî-i mezbûr istintak olundukda târîh-i muhtelife ile olan müddeʻâsını müddeʻî-i mezbûr Selim Efendi ikrâr edicek daʻvâsında zâhir hâli mükezzeb olmağın iltifât olunmadığı baʻde’t-tescîl huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fî 10 min-Şaʻbân sene 1161