Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 144 Hüküm no: 175 Orijinal metin no: [40a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fazlullah Paşa evkafından Pendik mukataasının gelirlerinin paylaşılması kaydıyla Mehmed Ağa’ya iltizam olunduğu. [Vech-i tahrîr-i] hurûf budur ki [Evlâdiye]t ve meşrûtiyet üzere mütevellîsi olduğum Gekbûze’de vâki‘ merhûm Gāzî Fazlullah Paşa Evkāfı’ndan Üsküdar’a [muzâfe Pen]dik karyesi mukāta‘ası işbu bin yüz seksen dört senesi Martı ibtidâsından Şubat’ı gāyetine gelinceye değin bir sene zabt u rabt eylemek üzere kıdvetü’l-emâsil ve’l-akrân Mehmed Ağa -zîde kadruhû- tâlib ve râgıb olup sene-i sâbıkı üzere der-uhde ve iltizâm olunup ol dahi iltizâmı kabûl etmeğin imdi mukāta‘a-i mezbûrdan hâsıl olan a‘şâr-ı şer‘iye ve cürm-ü cinâyet ve bâd-ı hevâ ve resm-i arûsâne ve ispençe ve resm-i iskele ve resm-i yava ve resm-i müjdegāne ve kul ve câriye ve beytülmal-ı âmme ve hâssa ve tapu-yı zemîn her ne hâsıl olur ise vakf-ı şerîf içün ahz ü kabz eyleye nısf-ı mukāta‘a içün işbu temessük merkūm yedine verildi nısf-ı âharı içün her ne hâsıl olur ise tarafımıza teslîm olunmak üzere mukāta‘a-i mezkûrdan hâsıl olan a‘şâr-ı şer‘iyeden mâ‘adâ cüz’î ve küllî mahsûlâtı ve vâki‘ olan beytülmal-ı âmme ve hâssa ve tapu-yı zemîn vâki‘ oldukda on bin akçeden merkūm Mehmed Ağa’ya ancak beş bin akçesin alıp mâ‘adâsın tarafımıza teslîm eylemek üzere merkūm ile her sene mukāta‘a-i mezkûre ber-vech-i iştirâk zabt u rabt olunmak üzere işbu temessük nısf-ı mukāta‘a içün yedine i‘tâ olunup imdi mukāta‘a-i mezkûrlar içün nısf iltizâmı olan dokuz yüz guruş merkūm Mehmed Ağa yedinden vakf-ı şerîf içün ahz ü kabz olunup ancak nısf-ı mukāta‘ayı zabt u rabt eylemek üzere işbu temessük verildi nısf-ı âharı tarafımızdan tahsîl olunmak üzere kavl olundu. Bende İbrahim el-mütevellî-i karye-i Pendik hâlâ.