Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 144 Hüküm no: 176 Orijinal metin no: [40a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’a izin verilenlerin dışında geliş gidişlere ve göç etmek isteyenlere kesinlikle izin verilmemesi hakkındaki emre uyulması Üsküdar kādısı -zîde fezâiluhüm- ve mefâhirü’l-kuzât ve’l-hükkâm me‘âdinü’l-fezâil ve’l-kelâm Gekbûze ve Yalakâbâd ve Yıldız köyü ve Gemlik ve Mudanya ve Taşköprü ve sâir ol havâlîde olan kazâların kuzât ve nüvvâbı -zîde fazluhum- ve mefâhirü’l-emâsil ve’l-akrân serdârlar ve evkāf zâbitleri ve sâir zâbitân ve iskele emînleri ve a‘yân -zîde kadruhüm- tevkī‘-i refî‘-i hümâyûn vâsıl olıcak ma‘lûm ola ki taşradan Âsitâne-i aliyyeme ev göçü gelmemek ve sefer-i hümâyûnuma memûr ve tavâif-i askeriyeden ve emti‘a ve eşyâ getiren tüccâr ve sahîh[sâhib]-i maslahaddan mâ‘adâ serserî gelmek isteyenlerin mürûr ve ubûruna bir tarîk ile ruhsat ve cevâz göstermek [göstermemek] içün emr-i aliyyem ile bi’d-defa‘ât tenbîh ve ekîdden hâlî olmadığına binâen emr-i şerîfim ale’l-ikdâm ve icrâsına sarf-ı makderet etmeniz matlûb-ı hümâyûnum olmakdan nâşî bu bâbda sünûh eden tesâmuhunuzdan iğmâz olmak bir türlü mutasavver? olmamağla cümleniz bi’l-ittifâk sa‘y ü dikkat ve mukaddemâ ve bu def‘a sâdır olan emr-i şerîfime mugāyir hareketden ihtirâz ve ictinâb eylemeniz fermânım olmağın tenbîhen ve ikdâmen işbu emr-i şerîfimle ısdâr rikâb-ı hümâyûnum kāimmakāmı ağalarından kıdvetü’l-emâsil ve’l-akrân Seyyid Ahmed -zîde kadruhû- ile irsâl olunmuşdur imdi vusûlünde hükûmetinizde olan memerr ü ma‘berleri üslûb-ı sâbık üzere bir hoşca zabt u hıfza dikkat ve ber-vech-i muharrer sefer-i hümâyûnuma memûr tavâif-i askeriyeden ve erbâb-ı ticâretden ve sahîh erbâb-ı mesâlihden mâ‘adâ Âsitâne-i sa‘âdetime gelmek irâdesinde olan ev göçü [ve] bilâ-maslahat kimesneleri sefînelere almamak ve berren ve bahren bu tarafa salıverilmemek üzere iskelelere amed-şüd eden sefîne reislerine ve zâbitlerine muhkem tenbîh ve te’kîd olunarak erbâb-ı mesâlihden gelmek murâd edenler sahîh erbâb-ı mesâlihden olduğu müte‘ayyin oldukdan sonra bir veyâ iki neferden ziyâdesinin bu tarafa mürûrlarına izin ve ruhsat verilmeyüp ol makūlelerin bilâ-tavakkuf geri izleri üzerine vilâyetleri câniblerine i‘âde ve ircâ‘larına bezl ü cehd ü miknet edüp bu bâbda tama‘-ı hâmma tebe‘iyyet ile ser-i mû iğmâz ve rehâvet misillü vaz‘ u hareket etmemek üzere vusûlünde mugāyir-i emr-i şerîfimle amel ve hilâfından gāyetü’l-gāye hazer eyleyesiz alâmet-i şerîfime i‘timâd kılasız. Tahrîren fî-evâhiri şehri Zilka‘de li-sene erba‘a ve semânîn ve mi’ete ve elf. Mûcebince mektûb-ı kāimmakām-ı rikâb-ı hümâyûn hâlâ