Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 394 Hüküm no: 659 Orijinal metin no: [64b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kolo v. Petro’nun Efti v. Kosta’ya olan borcunu ödemesi Maʻrûz; İşbu hâmilü’l-iʻlâm Efti v. Kosta nâm zimmî meclis-i şerʻde Edirnekapısı hâricinde Haslar yasakcısı mübâşeretiyle ihzâr olunan Kolo v. Petro nâm zimmî muvâcehesinde işbu mesfûr Kolo’ya sene-i mâziyede yüz altmış guruş ve bu sene de dört yüz yetmiş üç guruş ikrâz ol dahi yedimden iktirâz ve kabz ve umûruna sarfla istihlâk ve ol vechile cemʻan altı yüz otuz üç guruş hakkım olmağla iştirâ eylediğim leben bahâsına takāsan hesaplaşmak üzere mukāvelemize binâʼen benden mesfûr Kolo’dan beyne’l-hıref turfanda taʻbîr olunur evvel-i bahârdan rûz-ı Hızır’a dek iki bin yetmiş altı vakıyye lebenin beher vakıyyesi sekizer akçeye ve rûz-ı Hızır’dan sonra yedi bin yüz altmış altı vakıyye, beher vakıyyesi altışar buçuk akçeye olmak üzere müşterâm olan ol mikdâr kıymeti cemʻan altmış üç bin yüz seksen yedi akçe deynime takāsan karzdan olan meblâğ-ı mezbûrdan ol mikdârını ahz u istîfâ ve meblâğ-ı bâkī on iki bin yedi yüz yetmiş üç akçe mesfûr Kolo zimmetinde hakkım olup hatta târîh-i iʻlâmdan sekiz gün [65a] mukaddem Karfa karyesi toprağında vâkiʻ mandırada mesfûr Kolo ile vech-i muharrer üzere hesap gördüğümüzde baʻde’t-takās cihet-i karzdan olan hakkımdan bâkī on iki bin yedi yüz yetmiş üç akçe bana edâsı lâzım deyni olduğunu ikrâr ve iʻtirâf etmekle meblâğ-ı bâkī-i mezbûru mesfûr Kolo’dan taleb ederim deyü baʻde’d-daʻvâ ol dahi baʻzan ikrâr ve baʻzan inkâr edicek müddeʻî-i merkūm Efti zimmî ber-vech-i muharrer müddeʻâsını baʻde’t-taʻdîl ve’t-tezkiye şehâdetleriyle makbûle olan Mehmed Ağa b. Mustafa ve Feyzullah b. Ali ve zimmîyândan Petko v. Çero ve Manko v. Usto nâm kimesneler şehâdetleriyle vech-i şerʻî üzere isbât etmeğin meblâğ-ı bâkī-i mezbûr on iki bin yedi yüz altmış üç akçeyi müddeʻî-i merkūm Efti zimmîye edâ ve teslîm etmek üzere mesfûr Kolo zimmîye tenbîh-birle Eyüb mahkemesinde tescîl olunup mübâşiri iltimâsıyla huzûr-ı âlîlerine iʻlâm olundu. Fermân men-lehü’l-emrindir. Fi’l-yevmi’l-ışrîn min-Ramazani’l-mübârek li-sene ihdâ ve sittin ve miʼe ve elf.