Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 484 Hüküm no: 752 Orijinal metin no: [84b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Arka hamalları kethüdâ vekili es-Seyyid Yusuf’un ihracıyla İbrahim’in kethüdâ vekili tayini Maʻrûz-ı dâʻî-i Devlet-i aliyyeleridir ki; Medîne-i Ebâ Eyüb el-Ensârî’de vâkiʻ ashabü’l-iʻlâm müseccelü’l-esâmî arka hamalları meclis-i şerʻ-i hatîrde ihzâr etdirdikleri es-Seyyid Yusuf nâm kimesneden mezbûr es-Seyyid Yusuf üzerimize kethüdâ vekîli olduğu günden târîh-i iʻlâma gelince vazʻ ü hareketi nizâmlarımıza mugāyir ve celb-i mâl zuʻmuyla iftirâ ve tazyîk ve rencîdesinden rahatımız kalmamışdır deyü bi’l-iştikâ (...) olduğu hâlde her birileri iştikâ ve baʻde’l-yevm müteʻayyen olan iskelelerinde olmayıp umûr-ı kethüdâlığa karışmamak üzere mezbûr Yusuf’un ihrâcını ve üzerlerine âhar kethüdâ vekîli nasb u taʻyîn ve hilâf-ı şerʻ taʻaddîsi menʻ olunmasını iltimâs etmeleriyle cümlenin muhtârı işbu hâzır bi’l-meclis İbrahim nâm kimesne umûr ve husûslarını nizâmları üzere rüʼyet içün başkethüdâları maʻrifetiyle nasb u taʻyîn olunup mezbûr es-Seyyid Yusuf ihrâc ve fî-mâ baʻd [85a] iskelelerinde olmayıp min-külli’l-vücûh umûr-ı nizâmlarına karışmamak üzere iltimâslarına binâʼen mezbûr es-Seyyid Yusuf’a tenbîh-i şerʻî olunduğu medîne-i mezbûre mahkemesinde tescîl olunup bi’l-iltimâs huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fi’l-yevmi’s-sâdis min-Recebi’l-ferd li-sene selâse ve sittin ve miʼe ve elf.