Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 485 Hüküm no: 753 Orijinal metin no: [85a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sâliha bt. Abdullah Hatun’un vefât eden Ayşe bt. Abdullah Hatun’dan alacaklı olduğu iddiâsıyla Ayşe Hatun’un kocası Ali’ye karşı açtığı davada on guruş bedel ile anlaştığı Maʻrûz-ı dâʻî-i Devlet-i aliyyeleridir ki; Sâhibe-i arzuhâl Sâliha bt. Abdullah nâm hatun medîne-i Eyüb sâkinelerinden müteveffiye Âişe bt. Abdullah nâm hatunun zevci ve terekesine vazʻ-ı yedi mütehakkık olan derûn-ı arzuhâlde mezbûru’l-ism Ali b. Abdullah nâm kimesne ile terâfuʻ edip târîh-i iʻlâmdan sekiz sene mukaddem bi-tarîkı’l-emâne müteveffiye-i mezbûre Âişe Hatun’a teslîm eylediğim yüz guruşluk bir zer-i mahbûb altunumu min- kable’l-ahz fevt olmağla tereke-i vâfiyesinden alıverilmek üzere zevc-i mezbûr Ali’den taleb ederim deyü eylediği daʻvâ-yı mezbûresin mezbûr Ali baʻde’l-inkâr vesâtet-i muslihîn ile daʻvâ-yı mezbûresinden on guruş bedel-i makbûza mezbûr Ali ile sulh olup mâʻadâ doksan guruş ve sâire müteʻallika âmme-i deʻâvî ve mütâlebâtdan zevci mezbûr Ali ve sâir veresenin zimmetlerini ibrâ ve iskāt eyledikde ol dahi kabûl ve medfûʻu olan bedel-i sulhe müteʻallika daʻvâdan müddeʻiye-i mezbûre Sâliha Hatun’un zimmetini ibrâ ve iskāt edip katʻ-ı nizâʻ eyledikleri baʻde’t-tescîl mübâşiri Osman Çavuş iltimâsıyla huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fi’l-yevmi’r-râbiʻ min-Recebi’l-ferd li-sene selâse ve sittin ve miʼe ve elf.