Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 487 Hüküm no: 758 Orijinal metin no: [85b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emir Mustafa’nın evinde kötü davranışlarda bulunulmadığı Maʻrûz-ı dâʻî-i Devlet-i aliyyeleridir ki; Târîh-i iʻlâm gecesi medîne-i Ebâ Eyüb el-Ensârî’de Davud Ağa Mahallesi’nde Emir Mustafa’nın menziline ecnebî ve nâ-mahrem geldiğin haber verilmekle Vâlidesarayı Ustası ve cânib-i şerʻden Çukadâr [ve] mahalle-i mezbûre imamı ile vardıklarında menzil-i mezbûrun odası içinde mezbûr Emir Mustafa’nın zevcesi Habibe, vâlidesi Zeyneb nâm hatunlar ile ecnebî ve nâ-mahrem Ali nâm kimesne ahz ve meclis-i şerʻa ihzâr ve husûs-ı keyfiyet baʻde’s-suâl mezbûr Ali misâfiren gelip mezbûretân Habibe ve Zeyneb mekşûfetü’l-vech ve’l-âzâ ahz olundukların inkâr ve sâbıkāları olmayıp sû-i hâllerin dahi ahâlî-i mahalleden gelip haber verir olmamağla fî-mâ baʻd ırz ve edebleriyle olup misâfir içün başka mahal olmamağla ecnebî misâfiri getirmemek üzere taʻahhüdlerine binâʼen tenbîh-birle sebîlleri tahliye ve tescîl olunduğu bi’l-iltimâs huzûr-ı âlîlerine iʻlâm olundu. Bâkī fermân veliyyü’l-emrindir. Fî gurre-i min-Receb sene 1163