Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 491 Hüküm no: 769 Orijinal metin no: [87a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eyüb’de nizâmlara aykırı olarak sebzevât satanlara mani olunması Maʻrûz-ı dâʻî; İşbu ashâbü’l-iʻlâm Sebzevâtcı Kethüdâsı İsmail Ağa ve Yiğitbaşıları Hacı Osman Ağa ve ihtiyârları meclis-i şerʻ-i hatîrde işbu yedimize iʻtâ buyrulan emr-i âlîşân mantûku üzere İstanbul ve sâir mahallerde sebzevât beyʻi içün müteʻayyen vekâletlerimiz olup manav ve muhtekir makūleleri müceddeden dükkân ve peşgûnler ihdâsıyla sebzevât beyʻleri memnûʻâtdan olup Hazret-i Eyüb sûkunda kırk seneyi mütecâviz mahsûs bir aded sebzeci dükkânı olduğundan mâʻadâ medîne-i mezbûrede bahçıvan tâifeleri dahi beher yevm sepetler ile beyne’l-ahâlî maʻlûm Çarşıbaşı’nda olan mevziʻa sebzevât getirip ibâdullaha beyʻ ederler olup ihtiyâç yok iken manav tâifesinden Mustafa Beşe nâm kimesne kârına kanâʻat etmeyip birkaç günden beri manav dükkânında sebzeci dükkânı karşısına peşgûnlar ihdâs ve hilâf-ı emr-i âlîşân sebzevât beyʻiyle verilen nizâmımızın ihtilâline bâʻis olmuşdur deyü takrîr-i meşrûhlarına muvâfık emr-i âlîşân ibrâzıyla iştikâ ve inhâ etdiklerinde fî-nefsi’l-emr medîne-i mezbûre sûkunda bir aded mahsûs sebzeci dükkânı olduğu ve bahçıvan tâifeleri dahi külli yevm sepetler ile muʻayyen olan mahalle sebzevât getirip narh-ı rûzîsi üzere ibâdullaha beyʻ ederler olup sebze husûsunda muzâyaka olmayıp manav ve muhtekir makūlelerinin peşgûn ve dükkânı ihdâsıyla sebzevât beyʻ etmeleri memnûʻ olmağla o makūleler menʻ u defʻ buyrulmak bâbında fermân-ı âlîşânları sudûrunu istidʻâ-yı merhamet eyledikleri iltimâsıyla huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fi’l-yevmi’s-sânî ve’l-ışrîn min-Rebîʻi’l-âhir li-sene selâse ve sittin ve miʼe ve elf.