Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 491 Hüküm no: 770 Orijinal metin no: [87a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yakub Beşe’nin Molla Mehmed b. Mustafa b. Abdullah’a olan borcunu ödemesi Ceffe’l-kalem ve temmü’l-kelâm? Bismillâhirrahmânirrahîm ve bihî nestaʻîn fî-gurre-i Recebi’l-ferd sene 1163 Maʻrûz-ı dâʻî-i Devlet-i aliyyeleridir ki; Mahmiye-i İstanbul’da Küçükpazar’da sâkin Molla Mehmed b. Mustafa b. Abdullah’ın tarafından vekîli olup Kapan-ı asel’de mütemekkin işbu hâmilü’l-iʻlâm Kanilo v. Anuş nâm zimmî Mumcu Yakub Beşe ile Eyüb mahkemesinde meclis-i şerʻde terâfuʻ edip müvekkil-i mezbûrun mumcu âlâtından hisse-i maʻlûmesinin mezbûr Yakub Beşe müsteciri olmağla zimmetinde müctemiʻ yirmi aylık dört bin akçe icâreden dört yüz akçesini ahz bâkī üç bin altı yüz akçe hakkımı bi’l-vekâle müstecir-i mezbûr Yakub Beşe’den taleb ederim deyü daʻvâ etdikde mezbûr Yakub Beşe dahi cihet-i mezkûreden meblâğ-ı bâkī-i mezbûr edâsı lâzım deynimdir deyü ikrâr ve iʻtirâf etmekle mûcebiyle meblâğ-ı bâkī-i mezbûr üç bin altı yüz akçe icâreyi vekîl-i mesfûr Kanilo zimmîye red ve teslîme mezbûr Yakub Beşe’ye tenbîh-i şerʻî-birle tescîl olunup bi’l-iltimâs huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fî 2 min-Recebi’l-ferd sene 1163 El-abdü’d-dâʻî Ahmed en-Nâib bi-medîne-i Ebâ Eyüb el-Ensârî