Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 494 Hüküm no: 774 Orijinal metin no: [87b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hanife Hatun’un kendisine zina kasdıyla saldırıldığı yolundaki iddiâsını ispatlayamadığı Maʻrûz-ı dâʻî-i Devlet-i aliyyeleridir ki; Havâss-ı aliyye kazâsında Halkalı nâm karyeden sâhib-i arzuhâlin zevcesi olup bundan akdem sû-i hâli iʻlâm olunmağla ihrâc olunan Hanife nâm hatun karye-i mezbûre ahâlîsinden derûn-ı arzuhâlde mezkûr Berberî Mehmed nâm kimesne ile murâfaʻa olup iki ay mukaddem mezbûr Berberî Mehmed akşama karib menzilime duhûl ve matbahımda zinâ kasdıyla boğazımı sıkıp feryâd eylediğimde karye ahâlîsi tahlîs eylediler deyü eylediği müddeʻâsını mezbûr Berberî Mehmed bi’l-külliye inkâr ve karye imamı menzile duhûlüne şehâdet edip âhar iki nefer şehâdete gelen müddeʻiye akrabâsından Abdullah ve Osman nâm kimesnelerin adâvet-i dünyeviyeleri olduğunu ahâlî-i karyesi haber vermeleriyle makbûlü’ş-şehâde olmayıp âhar şâhidi olmamağla mezbûr Berberî Mehmed tahlîf olunup ve keyfiyet-i ahvâli suâl olundukda bu âna değin muʼâhezeyi mûcib hareketi zuhûr etmeyip kendi hâlinde ırzıyla mukayyed kimesnedir deyü hüsn-i hâlî müseccelü’l-esâmî karyesi ahâlîsi haber verdikleri huzûr-ı âlîlerine iʻlâm olundu. Fî 11 min-Saferi’l-hayr sene 1163