Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 495 Hüküm no: 777 Orijinal metin no: [88a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sâliha Hatun’un boşandığı kocası Mehmed Çelebi’den mehir ve nafakasını aldığının tespit olunduğu Maʻrûz-ı dâʻî-i Devlet-i aliyyeleridir ki; Derûn-ı arzuhâlde mezkûrü’l-ism Sâliha bt. Mehmed nâm hatun zevc-i mutallıkı sâhib-i arzuhâl Mehmed Çelebi b. Hasan ile lede’t-terâfuʻ mezbûr Mehmed zevcim olup bundan akdem beni bâyinen tatlîk etmekle zimmetinde mütekarrir iki bin akçe mehr-i müeccelimi ve nafaka-i iddet-i maʻlûmem ve meʼûnet-i süknâmı taleb ederim deyü baʻde’d-daʻvâ ve’l-istintak mezbûr Mehmed cevâbında zikr olunan iki bin akçe mehr-i müecceli mezbûre Sâliha’ya tamamen edâ ve teslîm edip nafaka-i iddet-i maʻlûme ve meʼûnet-i süknâ ve sâir hukūk-ı zevciyete müteʻallika âmme-i deʻâvîden benim zimmetimi ibrâ-i âmm ile ibrâ etmişdir deyü eylediği defʻ-i meşrûhunu iki nefer şâhidân-ı muʻaddilân şehâdetleriyle münkir-i mezbûre Sâliha muvâcehesinde vech-i şerʻî üzere isbât etmekle mûcebiyle mezbûre Sâliha merkūm Mehmed’e bî-vech muʻârazadan menʻ olunduğu tescîl olunup bi’l-iltimâs huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fî 10 Saferi’l-hayr sene 1163