Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 504 Hüküm no: 795 Orijinal metin no: [90a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mekkârî Osman’ın bakkallara mahsus eşyâ ve zahîreleri satmaması konusunda ikaz edildiği Maʻrûz-ı dâʻî-i Devlet-i aliyyeleridir ki; Medîne-i Hazret-i Ebâ Eyüb el-Ensârî ve tevâbiʻi Hasköy’de vâkiʻ ashâb-ı arzuhâl bakkal esnâfının pazarbaşıları Mustafa Çelebi ve el-Hâc İbrahim ve ihtiyârları meclis-i şerʻde medîne-i mezbûrede demirci Kıbtîlerin kurbünde Attâr Osman nâm kimesne muvâcehesinde yedimizde olan emr-i âlîde mastûr olduğu üzere bakkal dükkânı ihdâsı ve mahsûs zehâyirimizi beyʻ eylemek memnûʻâtdan iken mezbûr Osman kendi kâr u kisbine kanâʻat etmeyip dükkânında bakkal metâʻı ve müte‘alik zehâyiri hilâf-ı emr-i âlî beyʻ ve nizâmımızın ihtilâline baʻis olmağla mazmûn-ı emr-i şerîf ile amel ve tenbîh ve iʻlâm olunmak murâdımızdır deyü takrîrlerine muvafık emr-i şerîf ısdâr ve iştikālarına mezbûr Osman mahsûs olan metâʻı beyʻini ikrâr ve baʻde’l-yevm hilâf-ı emr-i âlî bakkal metâʻını beyʻle esnâf-ı mezbûreyi rencîde eylemeyip mevcûd olan bakkal metâʻını narh-ı rûzîsi üzere bakkāllara beyʻa taʻahhüd ve bir vechile katʻ-ı nizâʻ etdikleri huzûr-ı âlîlerine iʻlâm olundu. Bâkī fermân veliyyü’l-emrindir. Fî 15 Muharrem sene 1163