Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 503 Hüküm no: 794 Orijinal metin no: [90a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Papa Zaharni v. Andon’un Bakkal Hristo v. Kirkor’dan iddiâ ettiği alacak davasını isbât edemediği Maʻrûz-ı dâʻî-i Devlet-i aliyyeleridir ki; Havâss-ı refîʻa kazâsında Litros Papası olan Papa Zaharya v. Andon nâm zimmî meclis-i şerʻde taʻyîn olunan Mehmed Haseki mübâşeretiyle ihzâr olunan işbu hâmilü’l-iʻlâm Bakkāl Hristo v. Kirkor nâm zimmî muvâcehesinde yedi ay mukaddem mesfûr Hristo’ya kendi dükkânı içinde yüz on yedi guruş ikrâz ve teslîm edip hatta yirmi gün mukaddem bana ol mikdâr zimmetinde deyni olduğunu ikrâr dahi etmiş idi deyü tasaddî eylediği daʻvâ-yı mezbûresini mesfûr Hristo dahi bi’l-külliye baʻde’l-inkâr müddeʻî-i merkūm Papa Zaharya’dan müddeʻâsına beyyine taleb olundukda meblâğ-ı müddeʻâ-yı mezbûreyi ikrâz ve teslîmine şâhid ikāmetinden aczedip ve deyn-i mezbûru ikrârına getirdiği iki nefer Hasköy’den olmak üzere zimmî şâhidleri dahi Papa Zaharya indimizde muʻtemeddir deyü gelmişizdir mesfûr Hristo’nun ikrârını bilmeyiz hakīkaten husûs-ı mezkûr maʻlumumuz değildir deyü takrîrlerinden sonra müddeʻî-i mesfûrun âhar şâhid ikāmetinden aczini ve müddeʻâsı tezvîr olduğu inde’ş-şerʻ zâhir olmağla daʻvâsından fâriğ olup katʻ-ı nizâʻ etdikleri Eyüb mahkemesinde tescîl ve mübâşir-i merkūm kulları iltimâsıyla huzûr-ı âlîlerine iʻlâm olundu. Bâkī fermân men-lehü’l-emrindir. Fi’l-yevmi’r-râbiʻ aşer min-Muharremi’l-harâm li-sene selâse ve sittin ve miʼe ve elf.