Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 505 Hüküm no: 797 Orijinal metin no: [90b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Efendi’nin borcunu ödediğine dair şahit getirmesi Maʻrûz-ı dâʻî-i Devlet-i aliyyeleridir ki; Mehmed Efendi b. İbrahim medîne-i Eyüb mahkemesinde meclis-i şerʻde sâhib-i arzuhâl Ahmed Efendi b. Ali muvâcehesinde mezbûr Ahmed Efendi zimmetinde temessükü mantûku üzere deyn-i şerʻîden yüz yirmi beş guruş ve sâʻat bahâsından yirmi guruş ve hâric-i temessük bir reʼs bargir semeninden kırk beş guruş ki; cemʻan yüz doksan guruşun yirmi dört guruşunu yedinden baʻde’l-ahz ve’l-kabz minhâ meblâğ-ı mezkûrdan bâkī yüz altmış altı guruş hakkım kalmağla taleb ederim deyü baʻde’d-daʻvâ ve’l-istintak mezbûr Ahmed Efendi cevâbında meblâğ-ı müddeʻâ-yı merkūmdan ancak yirmi dört guruş zimmetinde bâkī edâsı lâzım deyni olduğunu ikrâr ve meblâğ-ı merkūmun elli sekiz guruşunu mezbûr Mehmed Efendi’ye bi’d-defâʻat edâ ve teslîm eylediğini ve bargir semeni olan kırk beş guruşu dahi altı ay mukaddem müddeʻî-i merkūm Mehmed Efendi’nin mecâlis-i müteʻaddidede ikrâr, iʻtirâfı üzere derûn-ı temessükde mezkûr meblâğ-ı mezbûr da dâhildir deyü defʻ-i meşrûhu üç nefer şuhûd-ı udûl ile baʻde’l-isbât ve’l-menʻ meblâğ-ı bâkī otuz dokuz guruşunu beş ay mukaddem tamamen edâ ve teslîm ol dahi kabzını ikrâr etmiş idi deyü eylediği defʻini müddeʻî-i mezbûr Mehmed Efendi münkir olmağla merkūm Ahmed Efendi şâhide havâle olunduğu bu vechile hıfz olmuş idi. Bâkī fermân hazret-i veliyyü’l-emrindir. Hurrira fi’s-sânî ve’l-ışrîn min-Zilhicceti’ş-şerîfe li-sene isneyn ve sittin ve miʼe ve elf.