Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 531 Hüküm no: 827 Orijinal metin no: [97a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müslüman birine aid olduğu anlaşılan cesedin muayene edilerek defnine izin verildiği Maʻrûz-ı dâʻî-i Devlet-i aliyyeleridir ki; İzzetlü bostancıbaşı ağa kıbel-i âlîlerinden taʻyîn buyrulan Hasan Haseki ile cânib-i şerʻden mürsel es-Seyyid Mustafa Efendi medîne-i Eyüb’de Bıçakcı Ferhad Mahallesi’nde Kuyulubağ taʻbîr olunur arsa-yı hâliyede mevcûd ismi nâ-maʻlûm Müslim cenâzesi üzerine varıp Müslimîn ile aʻzâsına nazar olundukda sağ yüzünde iki yerinde bıçak yarası olduğu baʻde’l-muʻâyene ve’l-keşf defnine izin-birle vâkiʻ hâli mahallinde tahrîr ve maʻan baʻs olunan ümenâ-i şerʻle meclis-i şerʻa gelip alâ-vukūʻıhî inhâ ve takrîr eyledikleri mübâşir-i merkūm iltimâsıyla huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fi’l-yevmi’t-tâsiʻ min-Zilhicceti’ş-şerîfe li-sene isneyn ve sittin ve miʼe ve elf.