Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 532 Hüküm no: 828 Orijinal metin no: [97a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kayaki v. Nirago ile Bakkal Kostantin’in aralarındaki kefâlet davasında anlaştıkları Maʻrûz-ı dâʻî-i Devlet-i aliyyeleridir ki; Kayaki v. Nirago? nâm zimmî işbu hâmilü’l-iʻlâm Bakkāl Kostantin v. Esterati nâm zimmî muvâcehesinde târîh-i iʻlâmdan altı gün mukaddem gāib ani’l-meclis Papa zimmîye bir reʼs bargirimi bir gün mesfûr Bakkāl Kostantin kefâletiyle îcâr eden mesfûr Papa zimmî bargir-i merkūmu altı gün bi-gayr-ı hakkın istiʻmâl ve taʻaddîsinden nâşî kulları mağdûr olmamla mûcib-i şerʻîsini taleb eylerim deyü tasaddî eylediği daʻvâ-yı mezbûresinden yüz on para bedel-i sulh üzerine baʻde inşâʼi’l-akd her biri âharın zimmetlerini ibrâ ve bu vechile katʻ-ı nizâʻ eyledikleri Eyüb mahkemesinde tescîl olunup bi’l-iltimâs huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fi’l-yevmi’s-sâbiʻ aşer min-Zilhicceti’ş-şerîfe li-sene isneyn ve sittin ve miʼe ve elf.