Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 540 Hüküm no: 845 Orijinal metin no: [98b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed’in kendisini darbedip küfrettiği iddiâsıyla Kuşcu Ali hakkında açtığı davadan vazgeçtiği Maʻrûz-ı dâʻî-i Devlet-i aliyyeleridir ki; Medîne-i Ebâ Eyüb el-Ensârî’de Davud Ağa Mahallesi sükkânından Deveci? Ahmed nâm kimesne sâhibe-i arzuhâl Rukiye’nin zevci Kuşcu Abdi tarafından vekîli Hasan Beşe muvâcehesinde Salı gecesi baʻde salâti’l-mağrib Ermeni menzilleri önünde olan meydanda müvekkil-i mezbûr Kuşcu Abdi külünk ile şetm ederek üzerime hücûm ve bi-gayr-ı hakkın darb-ı şedîd ile darbeylediği vakitde Vâlidesarayı’nın bölükbaşısı işbu hâzır bi’l-meclis Ahmed Bey kol ile zuhûr edip beni tahlîs etmişler idi deyü eylediği daʻvâ-yı mezbûresinden fâriğ olup ve mezbûr Kuşcu Abdi ve zevcesi Rukiye derûn-ı arzuhâlde tahrîr etdirdikleri vech üzere iddiʻâları gayr-ı vâkiʻ olmağla onlar dahi fâriğalar olup gerek bölükbaşı ile ve gerek birbirleriyle husûs-ı mezkûra müteʻallika her biri âharın zimmetlerini ibrâ ve iskāt edip katʻ-ı nizâʻ eyledikleri taʻyîn buyrulan Hasan Haseki kulları iltimâsıyla huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fi’l-yevmi’r-râbiʻ ve’l-ışrîn min-Zilkaʻde li-sene isneyn ve sittin ve miʼe ve elf.