Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 539 Hüküm no: 844 Orijinal metin no: [98b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İlyaszâde Mahallesi İmamı Yekçeşm es-Seyyid Mehmed ve babası el-Hâc Hüseyin’in bulundukları mahalleden ihracı Maʻrûz-ı dâʻî-i Devlet-i aliyyeleridir ki; Bâ-fermân-ı âlî savb-ı şerʻden mürsel Kâtib es-Seyyid Mustafa Efendi izzetlü bostancıbaşı ağa kıbel-i âlîlerinden husûs-ı katl tefahhus ve teftîşe meʼmûr Haseki Ali Ağa ve Çukadâr Ali kulları Topkapısı hâricinde İlyaszâde Mahallesi’ne vardıklarında ahâlî-i mahallenin iştikālarına binâʼen mahalle-i mezbûre İmamı Yekçeşm es-Seyyid Mehmed ve babası es-Seyyid el-Hâc Hüseyin ve diğer oğlu Berberî kıyâfetli Seyyid Mehmed Emin Efendi Eyüb mahkemesinde meclis-i şerʻa ihzâr olunup ahâlî-i mahalleden İsmail Usta b. Şaban ve İsa Bey b. Mehmed ve Derviş el-Hâc Hüseyin ve Mehmed Çelebi b. Emrullah ve Ahmed Beşe b. Osman ve Ahmed b. Şaban ve Ahmed b. Hasan ve el-Hâc Selim b. Ahmed ve Abdi Beşe b. Ahmed ve Bostanî Abdi b. Halil ve Ahmed b. İsmail ve Abdullah b. Hamza ve İsmail b. Ahmed nâm kimesneler her biri imam-ı mezbûr Yekçeşm Seyyid Mehmed ve babası Seyyid Hüseyin bilâ-kefîl âdemleri mahallemizde iskâna ve cümle kabâhati mürtekib ve mezbûr Seyyid Mehmed Emin erâzil makūleleriyle görüşüp bundan akdem mahallemiz sâkinelerinden Emine nâm hatunun menziline cebren duhûl ve misâfiresi hatunu fiʻl-i şenîʻ kasdıyla takbîl ve bu vechile evzâʻ-ı etvârlarından müteezzîler olup emniyet ve rahatımız yokdur deyü sû-i hâllerini muvâcehelerinde ihbâr ve ihrâclarını iltimâs etdikleri Eyüb mahkemesinde tescîl olunup huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fi’l-yevmi’s-sânî ve’l-ışrîn min- şehri Zilkaʻdeti’ş-şerîfe sene isneyn ve sittin ve miʼe ve elf.