Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 541 Hüküm no: 850 Orijinal metin no: [99a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Salamon v. Yasef’in Mustafa b. Ali’den gasbettiği otuz guruşu ödemesi << Maʻrûz-ı dâʻî-i Devlet-i aliyyeleridir ki; Mahmiye-i İstanbul’da Salma Tomruk kurbünde habbâz tablakârı işbu bâʻisü’l-iʻlâm Mustafa b. Ali nâm kimesne Vâlidesarayı Bölükbaşısı olan Ahmed Bey mübâşeretiyle ihzâr-ı şerʻ olunan Balat mahkemesi tahtında mütemekkin Salamon v. Yasef nâm Yahûdi muvâcehesinde mesfûr Salamon gâibân ani’l-meclis Bihor ve David [nâm] iki nefer Yahûdiler târîh-i iʻlâmdan iki gün mukaddem Balatkapısı önünde tarîkde beni meşgaleye düşürüp ve ol esnâda zafer bulup cebimden müddehâr kese ile otuz guruşumu gasben ahz etmişdir taleb ederim deyü mesfûr Salamon’dan daʻvâ etdikde mesfûr Salamon husûs-ı mezbûru baʻde’l-inkâr lâkin müddeʻâsı olan otuz guruşu edâ eylerim deyü taʻahhüdünü tescîl etdirdiği mesfûr Salamon dahi ber-vech-i muharrer ikrâr ve iʻtirâf etmeğin iʻtirâfına binâʼen meblâğ-ı mezbûr otuz guruşu müddeʻî-i mezbûr Mustafa’ya edâya mesfûr Salamon’a tenbîh-birle baʻde’t-tescîl bi’l-iltimâs huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fî 27 min-Zilka‘de sene 1162 >>