Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 545 Hüküm no: 857 Orijinal metin no: [99b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Miroğlu mumhânesinden çıkarılması istenen Ömer Beşe’nin üvey babası ve vekili Uzun Mehmed’in hesapları görülerek mezkûr mumhânenin tahliye edildiği Maʻrûz-ı dâʻî-i Devlet-i aliyyeleridir ki; Sâdır olan fermân-ı âlîlerine imtisâlen savb-ı şerʻ-i âlîden irsâl olunan Mevlânâ Mehmed Efendi Eğrikapı hâricinde Miroğlu mumhânesine varılıp akd-i meclis-i kavîm etdikde Eyüb Vakf-ı şerîfi mumcu ustalarının iştikālarına binâʼen ihrâcı fermân buyrulan derûn-ı arzuhâlde mezkûrü’l-ism olan Ömer Beşe’nin üvey babası vekîli Uzun Mehmed muvâcehesinde derûn-ı mumhânede mevcûd mumcu ustalarının bi’l-ittifâk tahmîn ve takvîmleri üzere elli çeki hatab altı bin akçe ve seksen dört vakıyye don yağı iki bin iki yüz altmış sekiz akçe ve ve fitil altmış akçe ve fıçı ve kalıplar ve hırdavât-ı sâire iki bin dört yüz akçe ki; cemʻan kıymetleri on bin yedi yüz yirmi sekiz akçeye bâliğ oldukdan sonra vakf-ı mezbûr mumcularından işbu hâzirûn olan Bektaş Beşe ve Yakub Beşe ve Mehmed Beşe ve Hüseyin Beşe ve Ahmed Beşe ve Halil Beşe ve İstanço ve Dimitri ve İstanko nâm kimesneler mumhâne-i mezbûr eşyâ-i muharrere ile nizâmları üzere teslîm olunup vakf-ı mezbûr kasabı ustalarının bâ-defter-i müfredât on yedi bin yetmiş sekiz akçe mutâlebeleri olmağla hesapları görülmek üzere tenbîh-birle mevlânâ-yı mezbûr vâkiʻ hâli baʻde’t-tahrîr mumhâne-i mezbûr tahliye ve teslîm olunduğu meclis-i şerʻa gelip inhâ eylediği mübâşiri Mumcu Mehmed kulları iltimâsıyla huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fî 12 min-Zilkaʻde sene isneyn ve sittin ve miʼe ve elf.