Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 544 Hüküm no: 856 Orijinal metin no: [99b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Molla Halil’in satın aldığını iddiâ ettiği arazi ve çiftlik hakkındaki iddiâsını ispatlayamadığı Maʻrûz-ı dâʻî-i Devlet-i aliyyeleridir ki; Sâhib-i arzuhâl Molla Halil nâm kimesne derûn-ı arzuhâlde isimleri mezkûrân Dergâh-ı âlî yeniçerilerinin üçüncü cemâʻati yoldaşlarından Bacacılar Kethüdâsı Ahmed ve na‘lbandbaşı mütekāʼidi el-Hâc Hüseyin nâm kimesneler ile terâfuʻ etdiklerinde bundan akdem mezbûrân Ahmed ve el-Hâc Hüseyin’den vilâyet-i Rumeli’nde İstavrova kazâsında Kaluvaç nâm karyede vâkiʻ maʻlûmü’l-hudûd ve’l-müştemilât çiftliğini yüz guruş semen-i makbûza iştirâ ve arazileri seksen guruş bedel-i makbûza tefevvüz edip lâkin karye-i mezbûre sâkinelerinden gāʼibe ani’l-meclis Ümmü Gülsüm ile mahallinde murâfaʻa bin yüz kırk dört senesi târihiyle müverrah yedimde olan bir kıtʻa sûret-i hüccet-i mübâyaʻa mantûku üzere zevci Ahmed Efendi’den iştirâ ve tefevvüz ve târîh-i mezbûrdan beri mâlike olduğu muvâcehemde sâbit olup ben zabt etmemekle mezbûrâna medfûʻum olan meblâğ-ı mezbûr yüz seksen guruşu taleb ederim deyü tasaddî eylediği daʻvâ-yı mezbûresini mezbûrân Ahmed ve el-Hâc Hüseyin bi’l-külliye baʻde’l-inkâr müddeʻî-i mezbûrun ikāmet eylediği iki nefer şâhidleri makbûlü’ş-şehâde olmayıp şâhid-i âhar ikāmesinden izhâr-ı aczi inde’ş-şerʻ zâhir oldukdan sonra mezbûrândan her birileri ba‘de’t-tahlîfü’ş-şer‘î müddeʻî-i mezbûr Molla Halil çiftlik-i mezbûra vâzıʻatü’l-yed olan mezbûre Ümmü Gülsüm’ün zevci gāib ani’l-meclis mezbûr Ahmed Efendi’den bin yüz elli dokuz senesi Recebi’nin on beşinci günü târîhiyle sicilden muhrec sûret-i hüccet nâtıka olduğu üzere çiftlik-i mezbûru yüz guruş semen-i medfûʻa ve arâzileri seksen guruş bedel-i medfûʻa iştirâ ve tefevvüz etmiş idim deyü cevâb-ı âhara tasaddî ve daʻvâ ol dahi zâhir-i hâl mükezzeb olmağın müddeʻî-i mezbûr Molla Halil mezbûrân Ahmed ve el-Hâc Hüseyin ile husûs-ı mezkûra müteʻallika bî-vech muʻârazadan menʻ-birle Eyüb mahkemesinde baʻde’t-tescîl mübâşiri Mumcu Mehmed iltimâsıyla huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fi’l-yevmi’s-sânî aşer min-Zilkaʻdeti’ş-şerîfe li-sene isneyn ve sittin ve miʼe ve elf.