Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 546 Hüküm no: 859 Orijinal metin no: [100a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bıçaklanarak vefât ettiği belirlenen Kazgancı Osman’ın defnine izin verildiği Maʻrûz-ı dâʻî-i Devlet-i aliyyeleridir ki; Sâdır olan fermân-ı âlîlerine imtisâlen savb-ı şerʻden irsâl olunan Mevlânâ es-Seyyid Mustafa Efendi Havâss-ı refîʻaya tâbiʻ Mevlevîhâne Yenikapısı hâricinde Mezarcı Tekye’si önünde yatar kırk dokuz cemâʻat neferâtından olmak üzere Kazgancı Osman nâm meyyitin cenâzesi üzerine varıp izzetlü bostancıbaşı ağa taraflarından taʻyîn buyrulan Ali Haseki ve Subaşı Mehmed Ağa ve Davudpaşa Ustası Ali Ağa ve sâir Müslimîn ile aʻzâsına nazar olundukda gerdanının sağ tarafında ve göğsünde ve sağ omzunda iki yerinde bıçak yarası olduğunu baʻde’l-muʻâyene ve’l-keşf defnine izin-birle vâkiʻ hâli mevlânâ-yı mezbûr mahallinde tahrîr ve maʻan baʻs olunan ümenâ-i şerʻle meclis-i şerʻa gelip alâ-vukūʻıhî inhâ ve takrîr eyledikleri baʻde’t-tescîl mübâşir-i <> merkūm iltimâsıyla huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fi’l-yevmi’s-sâdis aşer min-Zilkaʻdeti’ş-şerîfe li-sene isneyn ve sittin ve miʼe ve elf.