Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 546 Hüküm no: 860 Orijinal metin no: [100a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Takkeciler Cami-i şerifi Mahallesi’nde ve civârında kefili olmadan ikâmet edenlerin tespit olunarak düzenlenecek defterinin irsâli İzzetlü bostancıbaşı ağa ve Haslar nâibi efendi; Bu defʻa hısn-ı İstanbul hâricinde vâkiʻ Takkeciler Câmiʻ-i şerîfi kurbünde vâkiʻ bahçelerden birinde bir adam lâşesi bulunduğu tarafımıza inhâ ve ihbâr olunup bu makūle habâset ve melʻanete ictirâ edenler beher hâl bî-kisb ü kâr geşt ü güzâr eyleyen eşhâs ve erâzil makūlelerinin sû-i hulkı olduğu melhûz ve meczûm olmakdan nâşî ol makūle karîbü’l-ahdde taşradan gelip ol havâlîlerde baʻzı menâzil ve bahçe ve bostanlara duhûl eden eşhâs ve erâzilin teftîş ve tefahhuslarıyla ale’l-infirâd tahrîr ve dikkat olunması mühim ve muktezî olmağla imdi siz ki; ağa-yı mûmâ-ileyhsiz tarafınızdan atf-ı şikâyet ile meʼzûn mübâşir, haseki taʻyîn ve nâib-i mûmâ-ileyh maʻrifetiyle ebvâb-ı hısn-ı İstanbul’da Yenikapı hâricinde ve Takkeciler Câmiʻ-i şerîfi Mahallesi’nde ve ol havâlîlerde olan mahallâtda vâkiʻ büyût ve menâzil ve bahçe ve bostanları alâ-vechi’t-taharrî tefahhus ve istifsâr? ve bilâ-kefîl gelip sâkin ve mütemekkin olan kimler ise cümlesini isim ve resimleri ve vilâyetleri ile ale’l-infirâd taharrî ve defter ve defterini huzûrumuza arz ve iʻlâm eyleyip lâkin bu bahâne ile kaziyede alâkası olmayanlara hilâf-ı fermân-ı âlî cevr ü taʻaddîden be-gāyet ihtirâz ve mücânebet eyleyesin deyü buyruldu. [Fî] 7 Zilka‘de sene 1162