Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 547 Hüküm no: 862 Orijinal metin no: [100a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hırsızlık töhmetiyle tutuklanan Şerbetci Karabet ve Hekim Mehmed’in kefâlete bağlanıp tahliye olundukları Maʻrûz-ı dâʻî-i Devlet-i aliyyeleridir ki; Medîne-i Ebâ Eyüb el-Ensârî’de Süleyman Subaşı Mahallesi’nde Yakub nâm kimesne taʻyîn buyrulan Haseki el-Hâc Mahmud mübâşeretiyle Eyüb mahkemesine ihzâr olunan Eyüb iskelesi kurbünde sâkin Hekim Mehmed ve Hasköy’de Mîrî Paşa kurbünde mütemekkin Şerbetci Karabet muvâcehelerinde on iki gün mukaddem sâkin olduğum menzilimden nakd yüz doksan guruş ve bir incili kuşak ve Trablus kuşağı sirka olunmağla mahallemiz sükkânından işbu Uzun Hasan sevkiyle mezbûrân ahz olunmuş idi el-hâletü hâzihî mezbûrların husûs-ı sirkada alâkaları ve fiʼl-i maʻrifetleri olmadığına vukūfum olmağla daʻvâ ve nizâʻım yokdur deyip fâriğ olmağla ihtiyâten mezbûr Uzun Hasan’ın nefsine ve hîn-i mütâlebede ihzârına karındaşı Hüseyin ve İstanbul’da İbrahim Paşa-yı Atîk Mahallesi sükkânından Ahmed b. İbrahim nâm kimesneler ve mesfûr Karabet zimmînin dahi nefsine ve lede’l-iktizâ ihzârına Eyüb’de mütemekkin Çömlekci Avanes v. Sekbas kefîller olup kefâletleri baʻde’t-tescîl sebîlleri tahliye olunmak üzere mübâşiri iltimâsıyla huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fi’l-yevmi’t-tâsiʻ aşer min-Zilkaʻdeti’ş-şerîfe li-sene isneyn ve sittin ve miʼe ve elf.