Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 556 Hüküm no: 881 Orijinal metin no: [102a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çoban Todori’ye âid olup Radoc v. Ustoyko’nun elinde bulunan bargirin sâhibine iâdesi Maʻrûz; Çoban tâifesinden Todori v. Yorgo nâm zimmî Radoc v. Ustoyko nâm zimmî muvâcehesinde târîh-i iʻlâmdan altı gün mukaddem mülküm olan on bir guruş kıymetli işbu müşâhed kula bargir mülkümden zâyiʻ olup mesfûr Radoc zimmî yedinde bulmağla bi’l-istihkāk taleb ederim deyü baʻde’d-daʻvâ ve’l-istintak mesfûr Radoc cevâbında târîh-i iʻlâmdan dört gün mukaddem ismi maʻlûmum olmayan Kemerci zimmîden iki guruş ile kendi bargirimi verip bi-tarîkı’l-mübâdele mülküm olup müddeʻî-i mesfûrun mülkü olup mülkünde iken zâyiʻ olduğunu bi’l-külliye inkâr etmekle müddeʻî-i mesfûr ber-vech-i muharrer müddeʻâsını iki nefer şuhûd-ı udûlle vech-i şerʻî üzere baʻde’l-isbât ve’t-tahlîf zikr <> olunan bargiri müddeʻî-i mesfûra red ve teslîme mesfûr Radoc zimmîye tenbîh olunduğu Eyüb mahkemesinde tescîl olunup bi’l-iltimâs huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fî 16 min-Şevvâl sene 1162