Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 556 Hüküm no: 882 Orijinal metin no: [102a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sünbüle lâkabıyla tanınan Semiha’nın boşandığı kocası İsrail’den mehrini daha önceden aldığının tespit edildiği Maʻrûz-ı dâʻî-i Devlet-i aliyyeleridir ki; Çarşamba günü dîvân-ı sadr-ı âlîlerinde ba‘dehû Eyüb mahkemesinde meclis-i şerʻ-i hatîrde hâmile-i arzuhâl şahsı taʻrîf-i şerʻî ile muʻarrefe Sünbüle ismi ile mülakkabe Semiha nâm Yahûdiye derûn-ı arzuhâlde isimleri mezkûrân hasmından zevc-i muhâlıʻı İsrail nâm Yahûdi ile terâfuʻ etdiklerinde müddeʻiye-i mezbûre zevc-i muhâlıʻı mesfûr İsrail zimmetinde mütekarrir dört bin guruş mehr-i müeccel hakkım olup taleb ederim deyü daʻvâ, mesfûr İsrail Yahûdi cevâbında yedimde olan hüccet mantûku üzere müddeʻiye-i mezbûre Sünbüle ismi ile mülakkabe Semiha târîh-i iʻlâm senesi Ramazanı’nın yirmi yedinci günü Hasköy’de nâibü’ş-şerʻ olan Mehmed Abdülbâki Efendi huzûrunda mehr-i müeccel-i mezkûru üzerine muhâlaʻa olup hukūk-ı zevciyete ve sâire müteʻallika âmme-i deʻâvîden her birimiz âharın zimmetlerini ibrâ ve iskāt etmiş idik deyü mazmûnu takrîrine muvâfık hüccet ibrâzıyla eylediği defʻini müddeʻîye-i mezbûre münkire olmağın dâfiʻ-i mesfûr İsrail defʻ-i mezbûrunu nâtık hüccetinin mazmûnunu ikāmet eylediği dört nefer şuhûd-ı udûl ile vech-i şerʻî üzere baʻde’l-isbât ve kendi cinsinden beş nefer Yahûdiler dahi haber vermeleriyle müddeʻiye-i mezbûre mehr-i müeccel-i mezbûr mütâlebesiyle bî-vech muʻârazadan menʻ olunup tescîl olunduğu huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fi’l-yevmi’s-sânî ve’l-ışrîn min-Şevvâl li-sene isneyn ve sittin ve miʼe ve elf.