Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 557 Hüküm no: 884 Orijinal metin no: [102a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Arslan adlı zimmînin Hürmüz adlı zimmîye olan borcunu ödemesi Maʻrûz-ı dâʻî-i Devlet-i aliyyeleridir ki; İşbu hâmilü’l-iʻlâm Hürmüz nâm zimmî ihzâr-ı şerʻ etdirdiği Arslan nâm zimmî ile terâfuʻlarında yedinde olan temessükü mûcebince cihet-i karzdan hakkım olan elli guruşu mesfûr Arslan zimmîden taleb ederim deyü daʻvâ ve istinkâfı, mesfûr Arslan zimmî muvâcehesinde cihet-i mezkûreden elli guruş zimmetimde müddeʻî-i mesfûra edâsı lâzım deynimdir deyü ikrâr ve temessük iʻtâ etmiş idim hakīkatde deynim olmayıp kâziben ikrâr ve ber-vech-i muharrer temessük tahrîr ve iʻtâ eyledim dedikde bu sûretde müddeʻî-i mesfûr baʻde’t-tahlîf mûcebiyle meblâğ-ı mezbûrun edâsıyla mesfûr Arslan ilzâm olunduğu Eyüb mahkemesinde tescîl olunup bi’l-iltimâs huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fî 24 min-Şevvâli’l-mükerrem sene 1162