Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 558 Hüküm no: 885 Orijinal metin no: [102b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Paçacı Ali b. Ahmed’in oğlu Mehmed’in babasının ölmeden önce başkasına sattığı paçacı âletlerini talep etmesinin geçersiz olduğu Maʻrûz-ı dâʻî-i Devlet-i aliyyeleridir ki; İsterova kazâsında Liçeşte nâm karye ahâlîsinden iken bundan akdem vefât eden Paçacı Ali b. Ahmed’in sulbî oğlu sâhib-i arzuhâl Mehmed nâm kimesne medîne-i Eyüb sûkunda vâkiʻ paçacı dükkânı derûnunda paçacı âlâtına vazʻ-ı yedi mütehakkık olan Ali b. Mustafa b. Nasuh’un karındaşı ve tarafından zikr-i âtî husûsda şuhûd-ı udûlle vekâleti sâbit olan Ömer Beşe nâm kimesne muvâcehesinde babam müteveffâ Ali’nin ile’l-vefât mülkü olup baʻde vefâtihi bana ve karındaşlarım Hasan ve Osman’a ba‘dehû mezbûr Hasan fevt oldukda zikr olunan paça âlâtından isâbet eden hisse-i irsiyemi taleb ederim deyü daʻvâ etdikde vekîl-i mezbûr Ömer Beşe cevâbında yedinde olup bin yüz elli altı senesi Cemâziyelâhire’sinin on ikinci günü târîhiyle müverrah ibrâz eylediği bir kıtʻa iʻlâm mantûku üzere müddeʻî-i mezbûr Mehmed âlât-ı mezbûreye vâzıʻu’l-yed olan karındaşım müvekkilim mezbûr Ali Beşe ile târîh-i mezbûrda murâfaʻa-i şerʻ-i şerîf olduklarında müddeʻî-i mezbûr Mehmed babası Ali ile karındaşından baʻde’l-vefât müntakil bi-tarîkı’l-münâsaha nısf paçacı âlâtı bana isâbet eyledi deyü daʻvâ etdikde babası müteveffâ-i mezbûr Ali hâl-i hayâtında paçacı âlâtını semen-i maʻlûma âhara beyʻ ve teslîm ol dahi karındaşım müvekkilim mezbûr Ali Beşe’ye semen-i maʻlûm [ve] makbûza beyʻ u teslîm ve ol vechile mülk-i müşterâsı olmak üzere müvekkilim mezbûr Ali Beşe defʻini derûn-ı iʻlâmda isimleri terkīm olunan paçacılar Kethüdâsı Ebûbekir Beşe b. Mehmed ve Yiğitbaşı Hasan b. Halil şehâdetleriyle vech-i şerʻî üzere bi’l-muvâcehe baʻde’l-isbât bî-vech muʻârazadan müddeʻî-i mezbûr Mehmed menʻ olundukdan sonra müddeʻî-i mezbûr Mehmed müvekkilim mezbûr Ali Beşe yedinden teberruʻan altı guruş ahz u kabz ve katʻ-ı nizâʻ eylediğini nâtık ibrâz eylediği iʻlâm-ı şerʻiyyenin mazmûnunu müddeʻî-i mezbûr Mehmed gâh ikrâr ve gâh külliyen inkâr etmeğin udûlden olup baʻde’t-taʻdîl ve’t-tezkiye şehâdetleri makbûle olan paçacı zümresinden İbrahim b. Halil ve kebabcı tâifesinden Ebûbekir Beşe b. Ali nâm kimesneler şehâdetleriyle iʻlâm-ı şerʻiyyenin mazmûnu vech-i şerʻî üzere sâbit olmağın mûcebiyle müddeʻî-i mezbûr Mehmed bî-vech muʻârazadan menʻ olunup tescîl olunduğu Mübâşiri Ömer, Kapıkethüdâsı kulları iltimâsıyla huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fî 9 Ramazani’l-mübârek sene 1162