Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 559 Hüküm no: 887 Orijinal metin no: [102b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Boğularak öldüğü tespit olunan Avanes adlı zimmînin gömülmesine izin verildiği Maʻrûz; Sâdır olan fermân-ı âlîleri üzere savb-ı şerʻden irsâl olunan Mevlânâ es-Seyyid Mustafa Efendi derûn-ı arzuhâlde mezkûr Haslar kazâsına tâbiʻ Sâdabâd’da Tekye iskelesi kurbünde sâhil-i bahrde mevcûd Avanes nâm zimmînin lâşesi üzerine varıp âhar arzuhâl ile izzetlü bostancıbaşı ağa taraflarından taʻyîn olunan Çukadâr Yahya ve Sâdabâd Ustası Ahmed Ağa ve el-Hâc Mahmud Çavuş ve sâir müseccelü’l-esâmî Müslimîn ile hâlik-i mesfûrun ammisi Dragos zimmî hâzır olduğu hâlde cesedine nazar etdiklerinde cerh eseri olmayıp târîh-i iʻlâmdan bir gün mukaddem baʻde’z-zuhr mahâll-i merkūmda bi-sunʻihî deryâya girip garîkan hâlik olduğunu baʻde’l-keşf ve’l-muʻâyene lâşesini zîr-i hâke ilkāya izin-birle tenbîh eylediğini mevlânâ-yı mezbûr vâkiʻ hâli mahallinde tahrîr ve maʻan baʻs olunan ümenâ-i şerʻle meclis-i şerʻa gelip alâ-vukūʻıhî inhâ ve takrîr eylediği huzûr-ı âlîlerine iʻlâm olundu. Fermân hazret-i men-lehü’l-emrindir. Fî 14 min-Ramazan sene 1162