Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 560 Hüküm no: 890 Orijinal metin no: [103a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Panço v. Viço’nun borcunu ödemesi Maʻrûz-ı dâʻî-i Devlet-i aliyyeleridir ki; Bakkāl tâifesinden işbu hâmilü’l-iʻlâm Aneşte v. Hürmüz nâm zimmî Eyüb mahkemesine ihzâr etdirdiği kömürcü zümresinden Panço v. Viço nâm zimmî muvâcehesinde birbirlerinin emr-i kefâletleriyle mesfûr Panço gāibân ani’l-meclis karındaşı Yorgi ve Viço zimmetlerinde işbu bin yüz elli sekiz senesi Ramazanı târîhiyle müverrah temessük mantûku üzere cihet-i karzdan altmış beş guruş hakkım olmağla asâleten ve bi-hükmi’l-kefâle meblâğ-ı mezbûru mesfûr Panço’dan taleb ederim deyü eylediği müddeʻâsını Oruç Bey Mahallesi’nden İvaz Efendi Câmiʻi Kayyımı Ahmed Efendi b. el-Hâc İbrahim ve câmiʻ-i mezbûr Müezzini Ahmed Efendi nâm kimesneler şehâdetleriyle vech-i şerʻî üzere münkir-i mesfûr Panço zimmî muvâcehesinde baʻde’l-isbât mûcebince meblâğ-ı mezbûr altmış beş guruşu müddeʻî-i merkūm Aneşte zimmîye edâ ve teslîm etmek üzere mesfûr Panço zimmîye tenbîh olunup medîne-i mezbûre mahkemesinde tescîl olunduğu Edirnekapısı yasakcısı iltimâsıyla huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fî 19 Ramazani’l-mübârek sene 1162