Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 563 Hüküm no: 897 Orijinal metin no: [103a-9] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yeni evlendiği karısına bakmayan Kürd Hasan Beşe’nin ikaz edilmesi Maʻrûz; Medîne-i Ebâ Eyüb Ensârî’de Cezerî Kasımpaşa Mahallesi sâkinelerinden işbu bâʻisetü’l-iʻlâm Âişe nâm [hatun] ihzâr etdirdiği zevci Kürd Hasan Beşe mahzarında mezbûr Hasan Beşe beni sekiz gün mukaddem tezevvüç edip hâlâ infâk etmeyip ve bî-huzûr olup müfârakat murâd etdikde mesârif-i kesîrem gitti deyü ahz-ı mâl murâd ve rencîde etmekle zarâr ve ziyân gelmemek üzere kefîli alınıp ve beni infâka tenbîh-i şerʻî olunmak taleb ederim dedikde mezbûr Hasan Beşe zevcesi mezbûreyi tezevvüç eylemezden mukaddem Çömlekciler ateşcilerinden olmağla çömlekciler kârhânelerinde olup kendine henüz kimesne kefîl olmayıp otuz üç camcı yoldaşlarından olmak üzere iddiʻâ etmekle zevcesi mezbûreyi infâk ve tahvîf [ve] rencîde eylemeyip zarâr erişmemek üzere zâbiti maʻrifetiyle kefîli alınmak içün bi’l-iltimâs huzûr-ı âlîlerine iʻlâm olundu. Fî 24 Ramazan sene 1162