Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 563 Hüküm no: 898 Orijinal metin no: [103b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ömer Beşe b. Süleyman’ın boşadığı karısı Fâtıma bt. Abdullah’dan aldığı borçları ve mihrini ödemesi Maʻrûz; Medîne-i Hazret-i Ebâ Eyüb el-Ensârî’de Ahmed Dede Mahallesi sâkinelerinden işbu bâʻisetü’l-iʻlâm Fâtıma bt. Abdullah nâm hatun ihzâr-ı şerʻ etdirdiği zevc-i mutallıkı Ömer Beşe b. Süleyman nâm kimesne ile terâfuʻlarında mezbûr Ömer zimmetinde mütekarrir sekiz guruş on para mehrim ile bundan akdem karzdan olmak üzere bi’d-defâʻat yedimden kabz ve mesârifine sarfla istihlâk, ol vechile bana deyni olan elli beş guruş ki; cemʻan altmış üç guruş on üç para hakkım olup mezbûr Ömer’den taleb etdiğimde edâda taʻallül eder baʻde’s-suâl alıverilmek taleb ederim deyü daʻvâ eyledikde ol dahi ber-vech-i muharrer mehr-i mezbûr ile cihet-i mezkûreden meblâğ-ı mecmûʻ-ı mezbûr altmış üç guruş on para zimmetinde müddeʻiye-i mezbûre Fâtıma’ya edâsı lâzım deynimdir deyü ikrâr ve iʻtirâf etmeğin mûcebince meblâğ-ı mecmûʻ-ı mezbûrun edâsıyla mezbûr Ömer ilzâm olunup Eyüb mahkemesinde tescîl olunduğu bi’l-iltimâs huzûr-ı âlîlerine iʻlâm olundu. Bâkī fermân hazret-i men-lehü’l-emrindir. Fî 24 Ş sene 1162