Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 570 Hüküm no: 910 Orijinal metin no: [104b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nefriye’nin vakıf menzili tahliye ve teslim etmesi Maʻrûz-ı dâʻî-i Devlet-i aliyyeleridir ki; Derûn-ı arzuhâlde ismi mezkûre Afife nâm hatunun tarafından sâbitü’l-vekâle vekîli İmam Mehmed Efendi sâhibe-i arzuhâl Nefriye Nasrâniye ile nezâretimizde olan zikr-i âtî vakfın kāimmakām-ı mütevellîsi Hüseyin Çelebi hâzır olduğu hâlde terâfuʻlarında mezbûre Nefriye Nasrâniye Hasköy’de vâkiʻ Turşucuzâde Vakfı’ndan mütevellî temessükü mûcebince bi’l-icâreteyn mutasarrıfe olduğu menzilini bin yüz altmış senesi Cemâziyelûlâsı gurresinde müvekkilem mezbûreye izn-i mütevellî ile yüz elli guruş bedel-i makbûz mukābelesinde ferağ-ı katʻî ile ferağ etmekle menzil-i mezbûrdan ihrâc olunmak bi’l-vekâle murâdımdır deyü evvelen Hasköy Naibi Ebûbekir Efendi’nin iʻlâmı mûcebince ve sâniyen selefimiz Haslar Nâibi fazîletlü Ahmed Efendi dâʻîleri huzûrunda daʻvâ ol dahi ferağ-ı katʻîyi mukırra olmağla sübûtuyla hüküm-birle iʻlâm olunmuş iken menzil-i mezbûru tahliye ve teslîmden imtinâʻ eder deyü takrîrine mutâbık ibrâz eylediği iʻlâm-ı şerʻînin mazmûnunu mezbûre Nefriye Nasrâniye baʻde’l-ikrâr tasaddî eylediği vefâ daʻvâsı memnûʻ olup mesmûʻa olmamağla ferağ-ı katʻîyi ikrâr ve iʻtirâfına binâʼen ber-mûceb-i iʻlâm-ı şerʻî menzil-i vakf-ı mezbûru tahliye ve teslîm etmek üzere mezbûre Nefriye Nasrâniye’ye tenbîh-i şerʻî olunduğu huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fi’l-yevmi’s-sâmin aşer min-Recebi’l-ferd