Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 578 Hüküm no: 928 Orijinal metin no: [106b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Ağa’nın binasına eklediği pencereleri kaldırması Yâ Fettâh Maʻrûz; Medîne-i Eyüb’de Servi Mahallesiʼnde sâkine bâʻisetü’l-iʻlâm Âişe bt. Mehmed nâm hatunun zâtı baʻde’t-taʻrîfi’ş-şerʻî meclis-i şerʻde câr-ı mülâsıkı İbrahim Ağa b. Mehmed ile lede’l-murâfaʻa mezbûr İbrahim Ağa menzili odalarından kendi bahçesine nâzır muhdes oda pencerelerinden bir aded bahçesinin tahta perdesine karib olan penceresinden ve sofada ihdâs etdiği bir aded penceresinden benim makarr-ı nisvân olan menzilim odasıyla bahçem görünüyor havâlesi vardır deyü iddiʻâ ol dahi inkâr etmekle hâl mütebeyyin olmak içün kıbel-i şerʻden Mevlânâ Mehmed Efendi mahâll-i nizâʻın üzerine varıp cemâʻat-i Müslimîn ile rüʼyet eylediklerinde fi’l-hakīka mezbûr İbrahim Ağa’nın odasından müddeʻiye-i mezbûre Âişe’nin menzili odasıyla bahçesi görünür makarr-ı nisvân havâlesi olduğu zâhir ve nümâyân oldukdan sonra mezbûr İbrahim defʻ-i havâle ile baʻde’t-tenbîh bahçesinin müddeʻiye-i mezbûre Âişe tarafında olan bahçesinde tahta perde üzerine tûlen üç zirâʻ ve kadden bir zirâʻ ve pencere üzerinden duvara gelince tûlen iki zirâʻ ve kadden üç zirâʻ mikdârı perde vazʻ ve sofada ihdâs olunan pencereye sandık havâlesini defʻa müteʻahhid olduğunu mevlânâ-yı mezbûr meclis-i şerʻa gelip alâ-vukūʻıhî inhâ eylediği bi’l-iltimâs huzûr-ı âlîlerine iʻlâm olundu. Bâkī fermân men-lehü’l-emrindir. Fî 27 Cemâziyelâhir sene 1162