Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 577 Hüküm no: 927 Orijinal metin no: [106a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yeni saray ve Eski saraya getirilen ve suyolları yenilenen Halkalı suyunun kanunsuz olarak kullanımına mani olunması İftihârü’l-emâcid ve’l-ekârim câmiʻu’l-mehâmid ve’l-mekârim el-muhtass bi-mezîd-i inâyeti’l-Meliki’d-Dâim hâssa bostancıbaşı olan ( ) −dâme mecduhu− ve kıdvetü’n-nüvvâbi’l-müteşerriʻîn Haslar kazâsında nâibü’ş-şerʻ olan mevlânâ ( ) −zîde ilmuhu− tevkīʻ-i refîʻ-i hümâyûn vâsıl olıcak maʻlûm ola ki; Saray-ı cedîd-i âmire ve Saray-ı atîk-i maʻmûreye ve sâir mahallere cârî Halkalı suyunun yolları taraf-ı hümâyûnumdan tecdîd olunup mesârif-i kesîre ile vücûd-pezîr olmuş, tarîkin muhâfazası lâzime-i hâlden olmağla mâ-i mezbûrun menbaʻı olan Ayibe nâm mahalde Bostanî sütcüleri bu defʻa mandıra ihdâs ve meslek kapağını açıp tahrîb etmeleriyle meʼmûr olan suyolcular menʻ etmeye iktidârları olmamağla merkūmların sen ki; bostancıbaşı-yı mûmâ-ileyhsin tarafından mazarratları defʻ olunmak içün fermân-ı âlîye muhtâc olup ve fî-mâ baʻd dahi bu makūle tarîk-i mecrâ üzerine mandıra ihdâsıyla ahâlî ve hâricden tahrîb ederler vâkiʻ olur ise menʻ olunmasının lüzûmu olmağla bu defʻa sütcü bostancıların mandıraları kaldırılıp ve bundan sonra dahi menbaʻdan Edirnekapısı’na gelince gerek asıl ana yolunun ve gerek katmaların meslek kapaklarını açıp baʻzı tarlalarda bulunan mahalleri sürüp yâhud bağ çubuğu gars etmek içün hafr ile tahrîb ederleri olur ise siz ki; bostancıbaşı ve haslar nâibi mûmâ-ileyhimâsız maʻrifetiniz ile ol havâlîde olan çiftlik ashâbına ve kurâ ahâlîsine tenbîh ve tekîd olunup ve fî-mâ baʻd dahi bu makūle mazarrat îrâs edecek hareketleri zuhûr edenleri ihbâr ve menʻ olunmak içün suyolcu yedine emr-i şerîfim verilmek bâbında hâlâ binâ emîni olan kıdvetü’l-emâcid ve’l-ʻayân Ali −dâme mecduhu− arzuhâliyle istidʻâ etmeğin sen ki; bostancıbaşı-yı mûmâ-ileyhsin Haslar nâibi mûmâ-ileyh maʻrifetiyle, şerʻle menʻ ve alâ-vechi’t-tekîd tenbîh-i ekîd eyleyip bundan sonra mütenebbih olmayanları ahz ve haklarından gelinmek içün huzûr-ı Âsafîye ihzâr eylemek bâbında fermân-ı âlîşânım sâdır olmuşdur buyurdum ki; ( ) vusûl buldukda bu bâbda vech-i meşrûh üzere şeref-yâfte-i sudûr olan fermân-ı vâcibü’l-ittibâʻ ve lâzimü’l-imtisâlimin mazmûn-ı itâʻat-makrûnuyla âmil olasız, şöyle bilesiz alâmet-i şerîfe iʻtimâd kılasız. Tahrîren fî-evâil-i Recebi’l-ferd sene isneyn ve sittin ve miʼet ve elf. Kostantıniyyeti’l-mahrûse