Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 582 Hüküm no: 933 Orijinal metin no: [107a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kutucu el-Hâc Hüseyin’in kira süresi bittiği için bahçeyi sahibine iâde etmesi Maʻrûz-ı dâʻî-i Devlet-i aliyyeleridir ki; İşbu bâʻisü’l-iʻlâm Mehmed b. Abdullah nâm kimesne ihzâr-ı şerʻ olunan Kutucu el-Hâc Hüseyin nâm kimesne muvâcehesinde mezbûr el-Hâc Hüseyin medîne-i Eyüb’de Çavuş Kasım Mahallesiʼnde vâkiʻ çeşme üzerinde bahçemde beher mâh otuz para ücret ile müstecirim iken târîh-i iʻlâm senesi Recebi’l-ferdi gurresinden bi’t-terâzi fesh-i akd-i icâre ile bahçeyi bana teslîme müteʻahhid olmuş iken birkaç gün dahi mürûr ve fuzûlî zabt ve teslîmde mümânaʻat eder deyü daʻvâ, mezbûr el-Hâc Hüseyin dahi fesh-i akd-i icâre ile gurre-i Receb’den bahçeyi teslîme taʻahhüd eylediğini ikrâr ve iʻtirâfına binâʼen vech-i meşrûh üzere bahçeyi tahliye ve teslîme mezbûr el-Hâc Hüseyin’e tenbîh-birle tescîl olunduğu bi’l-iltimâs huzûr-ı âlîlerine iʻlâm olundu. Fermân men-lehü’l-emrindir. Fi’l-yevmi’s-sâdis min-Recebi’l-ferd li-sene isneyn ve sittin ve miʼe ve elf.