Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 583 Hüküm no: 935 Orijinal metin no: [107a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Beşe’nin iyi hâline şâhitlik edildiği Maʻrûz; Taʻyîn buyrulan Mumcu Osman kulları maʻrifetiyle mahbûsen meclis-i şerʻa ihzâr olunan Mehmed Beşe nâm kimesnenin sâkin olduğu medîne-i Ebâ Eyüb Ensârî’de Zeyneb Hatun Mahallesi İmamı Hoca Mehmed Efendi ve Müezzin Mehmed Çelebi ve müsinn ve ihtiyar cemâʻat-i Müslimîn’den Mezarcı Mustafa Çelebi ve diğer Mustafa Çelebi ve Bostanî el-Hâc Mustafa ve Terzi Mehmed ve Çörekci Ali Beşe ve Mehmed Çelebi ve sâirleri meclis-i şerʻa hâzirûn olup mezbûr Mehmed Beşe’nin keyfiyeti suâl olundukda mezbûr Mehmed Beşe kendi hâlinde kârı ile meşgūl-i derd-mend olup bu vakte gelince hilâf-ı şerʻ-i şerîf hareketi olmayıp bilâ-teşekkî bi-gayr-ı hakkın ahz olunup hakkında olunan teşekkî ifk ü iftirâ ve hilâf-ı vâkiʻdir deyü hüsn-i hâlini Vâlide[sarayı] Ustası hâzır olduğu hâlde mübâşir-i merkūm huzûrunda her biri sıhhati üzere hasbetenlillâh haber verdiklerini baʻde’t-tescîl mübâşir-i merkūm kulları iltimâsıyla huzûr-ı âlîlerine iʻlâm olundu. Fî 9 Receb sene 1162