Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 586 Hüküm no: 941 Orijinal metin no: [107b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Litros köyünde yıkılan ekmek fırınının yerine yenisinin yapılması Maʻrûz; Havâss-ı aliyye kazâsı kurâlarından derûn-ı arzuhâlde zikr olunan Litros nâm karyede nân-ı azîz tabh olunur kadîmden olan habbâz fırınını mâliki karye ahâlîsinden hâlik olmağla vereseden dahi taʻmîrinde adem-i kudretlerine binâʼen bi’l-külliye esâsa değin münhedim ve arsası dahi şirâen birkaç elden geçip el-yevm menzil olup ahâlîsinin ittifâk ve haberleriyle fırın-ı mezbûrun terki ve bu vechile idiği mütehakkık olup ve karye içinde âhar fırın dahi olmadığı cânib-i şerʻden mürsel Kâtip Mollazâde Mehmed Efendi dâʻîleri maʻan baʻs olunan ümenâ-i şerʻle mahallinde rüʼyet ve yine karye içinde enseb olan mahalde fırın binâ olundukda kimesneye zararı olmayıp ahâlî-i karyeye ve sâire enfaʻ idiği inhâ ve yine kadîmîsi üzere fırın binâ olunması içün fermân-ı âlîleri sudûru bâbında istidʻâları huzûr-ı âlîlerine iʻlâm olundu. Fermân men-lehü’l-emrindir. Fî 23 Cemâziyelâhire sene 1162