Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 587 Hüküm no: 944 Orijinal metin no: [108a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Çelebi’nin tasarrufunda bulunup Petro zimmînin kiraladığı vakıf bahçenin tahliyesi Maʻrûz; Mevlevîhâne Yenikapısı hâricinde İmâmî Mahallesiʼnde vâkiʻ vakıf bahçenin mütevellî-i vakf temessükü mantûku üzere icâreteyn ile mutasarrıf idiği mütehakkık olan işbu bâʻisü’l-iʻlâm Hüseyin Çelebi nâm kimesne kendinden mukaddem bahçe-i mezbûrenin mutasarrıfları vaktinden beri müstecir ve müddet-i icâresi hâlâ munkaziye olan bahçıvan Petro nâm zimmî muvâcehesinde bahçe-i mezbûreyi mahlûlden tefevvüz ve icâreteyn ile el-yevm tasarrufumda olup mezbûr Petro zimmî benimle tecdîd-i akd-i îcâr etmeksizin iznimsiz hubûbât zerʻ ve eşcâr gars edip hâlâ beynimizde îcâr bulunmamağla bahçe-i mezbûreyi bana teslîm etmek üzere ihrâcı matlûbumdur deyü iddiʻâ, mesfûr Petro cevâbında ötedenberi müstecir bulunup hubûbât zerʻ ve eşcâr gars eyledim mutasarrıfı mezbûr Hüseyin Çelebi’den îcâr etmedim deyü iʻtirâf ve şerʻan ihrâcı lâzım geldikden sonra bahçıvan kethüdâsı ve ustaları dahi şerʻan yâhud rızâsıyla ihrâc olunan bu makūle müstecirlerin kendi mülkleri olmak üzere terbiye ve amelleriyle hâsıl hubûbât ve gars olunan eşcâr ve âlât-ı lâzime-i maʻlûmelerinin takvîm olunan kıymetleri verilip ihrâc olunmak muʻtâd idiği dahi ihbâr etmeleriyle mesfûr Petro’nun derûn-ı bahçede mezrûʻât ve âlât-ı maʻlûmelerinin bi’l-ittifâk takvîmleri olan yirmi yedi bin sekiz yüz elli akçeye eşcâr-ı mağrûse ve hubûbât-ı mezrûʻasını kendi rızâsıyla merkūm Hüseyin’e nizâmları üzere beyʻ ve teslîm yâhud kalʻ-ı vâhid ve ber-muktezâ-yı şerʻ-i kavîm bahçe-i mezbûreden ihrâc ve dilediğine îcâr etmek üzere fermân-ı âlîleri sudûru bâbında mezbûr Hüseyin Çelebi istidʻâ-yı inâyet eylediği bi’l-iltimâs huzûr-ı âlîlerine iʻlâm olundu. Fermân hazret-i veliyyü’l-emrindir. Fî 22 min-Cemâziyelâhir sene 1162