Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 588 Hüküm no: 946 Orijinal metin no: [108a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hanife Hatun’un tasarrufunda bulunan Otakçılar’daki at değirmenindeki beygirlerin atık suyunun Ahiçeşme suyoluna zarar vermesine mani olunması Maʻrûz; Sâdır olan fermân-ı âlîlerine imtisâlen taraf-ı şerʻden irsâl olunan Mevlânâ Mehmed Efendi medîne-i Eyüb’de Otakçılar kurbünde vâkiʻ sâhibe-i arzuhâl Hanife’nin tasarrufunda olan at değirmenine varıp cemâʻat-i Müslimîn huzûrlarında akd olunan meclis-i şerʻde mezbûre Hanife değirmen-i mezkûrda mevcûd olan bargirlerin çirkâbı kurbünde vâkiʻ Hacı Murad Vakfı’nın mütevellî temessükü mantûku üzere ayak çeşmeleri kârîzine ilhâka meʼzûn olmağla ilhâk murâd etdikde Ahiçeşme’ye cârî olan suyoluna zararı vardır deyü ahâlî-i mahalleden bazıları mümânaʻat etmeleriyle keşfolunup vâkiʻ-i hâl mütebeyyin olsun deyü mezbûre Hanife taleb etmeğin erbâb-ı miyâhdan kethüdâları Mehmed Ağa ve Usta İbrahim ve sâir cemâʻat-i Müslimîn ile rüʼyet ve müşâhede eylediklerinde mârru’z-zikr Ahiçeşme’nin su yolu maʻlûm olmayıp ve esnâ-i ilhâkda su yolu dahi zuhûr eyledikde bir zirâʻ tahtından kebîr paşa künkü ferşiyle zararı mündefiʻ olur deyü bi’l-ittifâk haberlerini mevlânâ-yı mezbûr mahallinde baʻde’t-tahrîr maʻan baʻs olunan ümenâ-i şerʻle meclis-i şerʻa gelip alâ-vukūʻıhî inhâ ve takrîr eyledikleri bi’l-iltimâs huzûr-ı âlîlerine iʻlâm olundu. Fermân men-lehü’l-emrindir. Fi’l-yevmi’s-sâmin ve’l-ışrîn min-Cemâziyelâhir sene isneyn ve sittin ve miʼe ve elf.