Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 594 Hüküm no: 959 Orijinal metin no: [109b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Berber Hüseyin’in alacaklı olduğu yolundaki iddiâsını ispatlayamadığı Maʻrûz; Kalyoncu neferâtından sâhib-i arzuhâl Berber Hüseyin nâm kimesne Çömlekci tâifesinden derûn-ı arzuhâlde mezkûr Agop v. Avanes nâm zimmî muvâcehesinde mesfûr Agop toprak mangal işleyip vermek üzere iki sene mukaddem benden elli dört guruş istikrâz ve kabz edip meblâğ-ı mezbûr hâlâ zimmetinde kalmağla taleb ederim deyü daʻvâ etdikde mesfûr Agop zimmî deyn-i mezkûru inkâr edip müddeʻî-i mezbûrdan beyyine taleb olundukda Galata’da Kalyoncular Hanı’nda sâkin olmak üzere getirdiği Balat sükkânından Ali b. Mehmed ve Pusulacı Hanı’nda sâkin olmak üzere getirdiği el-Hâc Ahmed b. Yusuf ki; Eğrikapı dâhilinde sâkin hîn-i tezkiyede adem-i adâletleri zâhir olmağla cerh olunup ve üç nefer getirdiği şâhidleri dahi şehâdet edemeyip ve şâhid-i adl ikāmetinden aczi zâhir ve yemîne dahi tâlib olmadığından mâʻadâ müddeʻî-i mezbûrun daʻvâsından tezvîr fehm olunmağla bilâ-beyyine-i âdile bî-vech muʻârazadan müddeʻî-i mezbûr Berber Hüseyin menʻ olunduğu baʻde’t-tescîl mübâşiri Osman Çavuş iltimâsıyla huzûr-ı âlîlerine iʻlâm olundu. Fermân men-lehü’l-emrindir. Fi’l-yevmi’l-hâmis ve’l-ışrîn min-Cemâziyelevvel li-sene 1162