Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 595 Hüküm no: 962 Orijinal metin no: [110a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden Ali b. Yusuf’un ölmeden önce malının üçte birini Mahallesi’ndeki mescidin ihtiyaçlarının karşılanmasına vakfettiğinin tespit olunduğu Maʻrûz; Medîne-i Eyüb’de el-Hâc Hüsrev Mahallesiʼnde sâkin iken bundan akdem vefât eden Ali b. Yusuf b. Abdullah’ın ber-vech-i âtî vasiyyetini tenfîze kıbel-i şerʻden vasî nasb olunan bâʻisü’l-iʻlâm İmam Mustafa Efendi derûn-ı arzuhâlde mezkûratü’l-ism olup tereke-i müteveffâ-i mezbûra bi’l-verâse vâzıʻu’l-yed olan müteveffâ-i mezbûrun zevcesi Hatice Hatun ve sulbî oğlu Mehmed ile terâfuʻlarında müteveffâ-i mezbûr hâl-i hayatında ve kemâl-i akl-ı sıhhatinde fevtinden üç ay mukaddem sülüs malım mahalle-i mezbûrede olan mescid-i şerîfin mesâlihine sarf olunsun deyü vasiyyet edip musırran vefât eyledi deyü daʻvâ eylediğimde mezbûrân dahi inkâr etdiklerinde mahalle-i mezbûre ahâlîsinden es-Seyyid Mehmed b. es-Seyyid el-Hâc Hasan ve İsmail Çelebi b. Mustafa ve Ebûbekir b. Hasan nâm kimesneler müteveffâ-i mezbûr Ali b. Yusuf b. Abdullah hâl-i hayâtında ve kemâl-i akl-ı sıhhatinde fevtinden üç ay mukaddem sülüs malım mahalle-i mezbûre mescidinin mesâlihine sarf olunsun deyü vasiyyet edip musırran fevt oldu bizler bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şerʻiyye etdiklerinden sonra her biri sırran ve alenen taʻdîl ve tezkiye olunup şehâdetleri hüsn-i kabûlde vâkıʻa olmağla vasiyyet-i merkūmenin sübûtuna baʻde’l-hükm müteveffâ-i mezbûrun terekesinin sülüsü ahz ve vasiyyet-i merkūme vech-i şerʻî üzere tenfîz olunmak iktizâ eylediği baʻde’t-tescîl mübâşirleri el-Hâc Hüseyin Çavuş kulları iltimâsıyla huzûr-ı âlîlerine iʻlâm olundu. Fermân hazret-i veliyyü’l-emrindir. Fi’l-yevmi’s-sâmin ve’l-ışrîn min-şehri Cemâziyelûlâ li-sene isneyn ve sittin ve miʼe ve elf.