Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 595 Hüküm no: 961 Orijinal metin no: [109b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ömer Ağa’nın tasarrufunda olup yanlışlıkla kirâcısı tarafından Mehmed Beşe’ye satılan vakıf menzilin sahibine iâdesi Maʻrûz; Medîne-i Eyüb’de Baba Haydar Mahallesi sâkinlerinden işbu bâʻisü’l-iʻlâm Ömer Ağa nâm kimesne ihzâr-ı şerʻ etdirdiği Mehmed Beşe nâm kimesne mahzarında Zeliha nâm sâhibetü’l-hayrın kürsî-i vakfı musakkafâtından Medîne-i mezbûrede Aşcıbaşı Mahallesiʼnde vâkiʻ etrâf-ı erbaʻadan Müezzin İbrahim ve Hüseyin Kethüdâ ve Turşucu Mehmed ve tarîk-i âm ile mahdûd maʻlûmü’l-müştemilât menzil işbu mütevellî temessükü mantûkunca bi’l-icâreteyn tasarrufumda olup mezbûr Mehmed Beşe müşâhereten müsteciri olup alâkası yoğiken mutasarrıf olduğum menzil-i vakf-ı mezbûru üç yüz guruş bedel mukābelesinde fuzûlî ve bilâ-izn-i mütevellî işbu hâzır bi’l-meclis diğer Mehmed Beşe’ye ferâgat ve bedelden on guruş peşin ahz ol dahi havza-i tasarrufuna dâhil olmak zuʻmuyla menzil-i mezbûrda üç ay sâkin olmağla ihrâcını daʻvâ etdikde mezbûrândan her biri hakīkat-i hâl vech-i mübîn üzere olduğunu ikrâr ve iʻtirâflarına binâʼen menzilde sâkin olan Mehmed Beşe menzil-i mezbûru tahliye ve teslîm etmek üzere ve makbûzu olan reddî iktizâ eden on guruşu kabz eden Mehmed Beşe red ve teslîm etmek üzere her birine baʻde’t-tenbîh ve’t-tescîl bi’l-iltimâs huzûr-ı âlîlerine iʻlâm olundu. Fermân men-lehü’l-emrindir. Fi’l-yevmi’r-râbiʻ ve’l-ışrîn min-Cemâziyelevvel li-sene isneyn ve sittin ve miʼe ve elf. 1162