Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 596 Hüküm no: 964 Orijinal metin no: [110a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Pazarbaşı Mustafa’nın şartlı olarak sattığı dükkan hissesini iade talebi Maʻrûz; Çarşamba günü dîvân-ı âlîlerinde maʻkūd meclis-i şerʻ-i şerîf-i enverde sâhib-i arzuhâl Pazarbaşı Mustafa derûn-ı arzuhâlde mezkûrü’l-ism olan Yunus nâm kimesne ile terâfuʻlarında medîne-i Eyüb el-Ensârî’de çarşıbaşında Mustafa Çelebi dükkânı demekle maʻrûf bakkal dükkânı derûnunda el-an mevcûde olup beynimizde maʻlûme gedik taʻbîr olunur müstakillen mülküm olan bakkal âlâtının nısf-ı şâyiʻini sadâkat ile bana hizmet edip hıyânet etmemek şartıyla bundan akdem yüz yirmi beş guruş semen-i makbûza merkūm Yunus’a beyʻ u teslîm etmiş idim lâkin beyʻin fesâdına binâʼen nısf-ı mezkûru istirdâd taleb ederim deyü daʻvâ eyledikde ol dahi ber-vech-i muharrer ikrâr ve iʻtirâf etmekle baʻde’l-fesh makbûzu olan meblâğ-ı mezbûr yirmi beş guruşu mezbûr Mustafa merkūm Yunus’a teslîme merkūm Yunus dahi nısf-ı şâyiʻi-i merkūmu mezbûr Mustafa’ya teslîm edip vech-i mezkûr üzere beynlerine faysal verildiği baʻde’t-tescîl mübâşirleri Hasan Çavuş kulları iltimâsıyla huzûr-ı âlîlerine iʻlâm olundu. Fermân men-lehü’l-emrindir. Fi’l-yevmi’s-sâbiʻ ve’l-ışrîn min-şehri Cemâziyelevvel li-sene 1162