Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 599 Hüküm no: 970 Orijinal metin no: [110b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hatun’un kocasını Mustafa’nın katlettiği yolundaki iddiâsını ispatlayamadığı Maʻrûz; Çarşamba günü dîvân-ı âlîlerinde maʻkūd meclis-i şerʻ-i şerîfde arzuhâlde mezkûrü’l-ism Hatice nâm hatun asâleten ve sagīre kızı Nefise’den vesâyeten Mustafa nâm kimesne mahzarında mezbûr Mustafa Terkos nâhiyesine tâbiʻ Boyalık nâm karyede vâkiʻ Avcıbaşı çayırında karye-i mezbûre ahâlîsinden zevcim ve mezbûre Nefise’nin babası Topaç Osman demekle maʻrûf şahsı zulmen katl eyledi deyü üzerine daʻvâ ve merkūm Mustafa inkâr etmekle müddeʻiye-i mezbûre Hatice’den beyyine taleb olundukda ikāmet-i beyyineden aczi zâhir oldukda merkūm Mustafa’ya yemîn verilip müddeʻiye-i merkūme bilâ-beyyine muʻârazadan menʻ olunup baʻde haze’l-menʻ ihzâr-ı beyyine etmedikce daʻvâ-yı mezbûre şerʻan tekrar istimâʻ olunmamak iktizâ eylediği baʻde’t-tescîl mübâşir kulları Mehmed Çavuş iltimâsıyla huzûr-ı âlîlerine iʻlâm olundu. Bâkī fermân hazret-i men-lehü’l-emrindir. Fi’l-yevmi’s-sâlis aşer min-Cemâziyelevvel li-sene isneyn ve sittin ve miʼe ve elf.