Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 146 Hüküm no: 179 Orijinal metin no: [40b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Soğanlık, Yakacık ve tevabii mukataasının İsmail Ağa’ya iltizam olunduğu Vech-i tahrîr-i hurûf budur ki İşbu bin yüz seksen dört senesi Martı ibtidâsından uhde-i iltizâmımızda olan Üsküdar kazâsına tâbi‘ Adalar nâhiyesine tâbi‘ Soğanlık ve Yakacık ve tevâbi‘i mukāta‘asının sene-i mezbûr Martı ibtidâsından Şubat’ı gāyetine gelince işbu dârende-i temessük kıdvetü’l-emâsil izzetlü İsmail Ağa’ya sene-i sâbıkı üzere der-uhde ve iltizâm olunup mûmâ-ileyh İsmail Ağa dahi ber-vech-i muharrer iltizâmı kabûl edüp bedel-i iltizâmı olan ma‘lûmü’l-mikdâr meblağı tamâmen tarafımıza edâ ve teslîm eyledikde biz dahi bi’t-tamâm ahz ü kabz edüp yedine [zabtı için] işbu temessük verilmişdir gerekdir ki ağa-yı mûmâ-ileyh sene-i mezbûr Martı ibtidâsından Şubat’ı gāyetine değin serbestiyet üzere vâki‘ olan a‘şâr-ı şer‘iye ve rüsûmât-ı örfiye ve tapu-yı zemîn ve resm-i zemîn ve cürm ü cinâyet ve yava ve kaçgun ve beytülmal-ı âmme ve hâssa küllî ve cüz’î her ne minvâl üzere ahz ü kabz ede gelmişler ise ağa-yı mûmâ-ileyh dahi ol vechile zabt u rabt ve serbestiyet üzere cem‘ ü tahsîline tarafımızdan ve taraf-ı âhardan dahl ü ta‘arruz olunmaya ve’s-selâm. El-hakīr el-Hâc Ahmed Mültezim hâlâ.